Սոցինտերնը Ընդունեց ՀՅԴ Ներկայացուցած Բանաձեւը, Որմով Կը Դատապարուի Ազրպէյճանի Գործողութիւնները ՀՀ-ի Դէմ

Աշխարհ, Հայաստան, Սփիւռք

Սիրելի հայրենակիցներ, ինչպէս տեղեակ էք, ՀՅԴ պատուիրակութիւնը վերջին օրերուն կը գտնուէր Մատրիտ, մասնակցելու սոցիալիստական ինտերնացիոնալի 26-րդ քոնկրեսի աշխատանքներուն, եւ ես կ՝ուզեմ որոշակի տեղեկութիւններ տրամադրել քոնկրեսի աշխատանքներէն։ Այս մասին Facebook-ի ուղիղ եթերով նշած է ՀՅԴ Հայ Դատի Կեդրոնական գրասենեակի յատուկ ծրագրերու պատասխանատու Գէորգ Ղուկասեան։

«Նոյեմբեր 25-27 Մատրիտի մէջ իրականացաւ Սոցիալիստական ինտերնացիոնալի նիստը եւ քոնկրեսի 26-րդ նիստը, որուն Դաշնակցութիւնը կը մասնակցէր առանձին պատուիրակութեամբ։ Պատուիրակութեան անդամներն էին Սոցիալիստական ինտերնացիոնալի փոխնախագահ Մարիօ Նալբանդեան, ՀՅԴ Բիւրոյի անդամ եւ Արցախի Հանրապետության Ազգային ժողովի պատգամաւոր Դաւիթ Իշխանեան, Սոցիալիստական ինտերնացիոնալի երիտասարդական կազմակերպութեան փոխնախագահ Սարինէ Աբրահամեան եւ ես։

Խորհուրդի եւ քոնկրեսի աշխատանքները բաւական յագեցուած էին։ Մեր պատուիրակութիւնը ունէր մասնակցութեան շատ յստակ օրակարգ եւ տեսանք, որ Դաւիթ Իշխանեանը պատմական ելոյթ ունեցաւ Սոցիալիստական ինտերնացիոնալի քոնկրեսի ժամանակ, որուն ընթացքին դահլիճին մէջ ներկայ էր Սպանիոյ վարչապետը, Ալպանիոյ վարչապետը, Փորթուկալի վարչապետը, Եւրոպական Միութեան եւ արտաքին քաղաքականութեան անվտանգութեան հարցերով գերագոյն յանձնակատար Ճոզէբ Պորելը, այլ պետութիւններու ղեկավարներ։ Դաւիթ Իշխանեանի ելոյթը շատ կարեւոր ձեռքբերում էր, եւ այն բոլոր հաղորդագրութիւնները, որ մենք կ՝ուզէինք փոխանցել միջազգային գործընկերներուն, եղան։

Միւս կարեւոր ձեռքբերումը քոնկրեսին կողմէ Մարիօ Նալբանդեանի վերընտրութիւնն էր իբրեւ Սոցիալիստական ինտերնացիոնալի փոխնախագահ։ Դաշնակցութիւնը Սոցիալիստական ինտերնացիոնալին կ՝անդամակցի 1907թ․-էն եւ միջազգային սոցիալիստական հանրոյթի ծիրէն ներս Դաշնակցութեան վարկանիշը բաւական բարձր է, որ արտայայտեց Մարիօ Նալբանդեանի միաձայն վերընտրութիւնը իբրեւ Սոցիալիստական ինտերնացիոնալի փոխնախագահ, որմով Դաշնակցութիւնը աշխարհի խոշորագոյն կազմակերպութեան մէջ, որ կազմուած է կուսակցութիւններէ, պահպանեց փոխնախագահի հանգամանքը»,– նշեց ան։

Ղուկասեանը յայտնեց, որ Խորհրդաժողովի քոնկրեսի աշխատանքներուն վերջին օրը ընդունուեցաւ բանաձեւ, որ ներկայացուցած էր Դաշնակցութիւնը. «Այդ բանաձեւը ներկայացնելու պատիւը ունեցայ ես։ Բանաձեւով քոնկրեսը կը դատապարտէ Ազրպէյճանական ներխուժումը, յարձակումը Հայաստանի տարածքի վրայ, կը դատապարտէ քաղաքացիական ենթակառուցուածքներու ռմբակոծումը եւ բանաձեւը շատ յստակ կը նշէ, որ Ղարաբաղեան հիմանխնդիրը լուծուած չէ, եւ որ այդ խնդրի համապարփակ լուծումը այն գրաւականն է, որ կրնայ երաշխաւորել յարատեւ խաղաղութիւն Հարաւային Կովկասի մէջ։ Բանաձեւը նաեւ կ՝անդրադառնայ ռազմագերիներու խնդիրներուն, շատ յստակ բառացի կ՝ընդգծէ, որ անոնք Ազրպէյճանի մէջ կ՝ենթարկուին կտտանքներու, եւ այս առումով եւս կ՝ըսէ իր դատապարտող խօսքը։ Քոնկրեսի աշխատանքները աւարտած են։ Շատ յստակ կ՝ուզեմ նշել, որ Դաշնակցութեան պատուիրակութեան 4 անդամներէն ոեւէ մէկը Հայաստան չի վերադառնար եւ ոչ ալ կը վերադառնայ այն երկիրներ, ուրկէ ժամանած էին Մատրիտ։ Իշխան Սաղաթելեանի Facebook-ի վերջին գրառումէն տեղեակ ենք, որ Դաշնակցութիւնը վերջին մէկ շաբթուան ընթացքին լայնածաւալ արտաքին յարաբերական աշխատանքներ կ՝իրականացնէ ամբողջ աշխարհի մէջ»։