Ազատ Ոճի Ըմբիշները 4 Մետալ Նուաճած են Մինչեւ 23 Տարեկաններու Եւրոպայի Առաջնութեան

Այլեւայլ, Աշխարհ, Հայաստան

Պուլկարիոյ Փլովտիւ քաղաքին մէջ աւարտած է ըմբշամարտի մինչեւ 23 տարեկաններու Եւրոպայի առաջնութիւնը, որուն ծիրէն ներս Հայաստանի ազատ ոճի հաւաքականը նուաճած է 2 արծաթէ եւ 2 պրոնզէ մետալ: Այս մասին կը հաղորդէ Armenpress.am-ը։

Յաբեթնակ Կուրղինեանի գլխաւորած խումին մէջ արծաթէ մետալներ նուաճած են Հրաչեայ Մարգարեանը (65 քկ) եւ Նարեկ Յարութիւնեանը (70 քկ): Պրոնզէ մետալի համար պայքարին Էդիկ Յարութիւնեանը (57 քկ) 10:0 հաշուով ջախջախիչ յաղթանակ տարած է թուրք Եուսուֆ Տեմիրի նկատմամբ, իսկ Նորիկ Յարութիւնեանը (61 քկ) նոյն 10:0 հաշուով յաղթած է Հիւսիսային Մակեդոնիոյ ներկայացուցիչին:
 
Պրոնզէ մետալ նուաճելուն մօտ եղած են նաեւ 74 քկ քաշային Մենուա Եարիբեկեանը, 79 քկ քաշային Մուշեղ Մկրտչեանը եւ 86 քկ քաշային Մհեր Մարկոսեանը, որոնք, սակայն, պարտուած են վճռորոշ գօտեմարտերուն:

Ազատ ոճի ըմբշամարտի Հայաստանի հաւաքականի կազմին մէջ Մ23 տարեկաններու ԵԱ-ին մասնակցած է նաեւ 125 քկ քաշային Յովհաննէս Մաղաքեանը, որ եւս անմասն մնացած է մետալէ: