Թշնամին Միշտ Պէտք է Զգայ, որ Մենք Միասնական Ենք. Սահմանամերձ Շուռնուխի Մէջ Հայկական Եռագոյնը Պիտի Բարձրացուի․ Առուշ Առուշանեան

Այլեւայլ, Հայաստան

Թշնամին միշտ պէտք է զգայ, որ մենք միասնական ենք. սահմանամերձ Շուռնուխի մէջ պիտի բարձրացուի հայկական եռագոյնը։ Այս մասին կը տեղեկացնէ Գորիս համայնքի ղեկավար Առուշ Առուշանեան։

«Յարգելի հայրենակիցներ

Մարտ 7-ին բոլորը սիրով կը հրաւիրենք Շուռնուխ, ուր հանդիսաւոր կերպով պիտի բարձրացուի հայկական եռագոյնը՝ 30մ բարձրութեամբ։ Հայաստանի մէջ ամենաբարձր դրօշը առաջինը տեղադրուեցաւ Կապանի մէջ, երկրորդը պիտի ծածանուի Շուռնուխի մէջ։

Յանուն հայկականութեան վերադարձի, մենք պիտի շարունակենք արարել, պայքարիլ յանուն մեր հողի, մեր մշակոյթի, մեր արժէքներու, մեր հաւատքի։ Շուռնուխէն ընդամէնը քանի մը մեթր հեռաւորութեան վրայ գտնուող թշնամին միշտ պէտք է զգայ, որ մենք միասնական, համախմբուած կերպով սահմանամերձ բնակավայրերու կողքին ենք։ Մարտ 7-ին, ժամը 14։00-ին պիտի սկսին ձեռնարկները։ Խոշորացուած համայնքի բոլոր բնակավայրերը պիտի ներկայանան աւանդական ուտելիքներով, Շուռնուխի մէջ ամբողջ օրը մշակութային հետաքրքրական նախաձեռնութիւններ պիտի ըլլան»։