Աւստրալիան Կը Սատարէ ԵԱՀԿ Մինսկի Խումբի Գործընթացին Եւ Արցախի Ժողովուրդի Ինքնորոշման Իրացման

Աշխարհ, Հայաստան, Սփիւռք

Աւստրալիոյ արտաքին գործոց նախարար Մարիս Փէյնը վերահաստատած է աւստրալիական կառավարութեան աջակցութիւնը ԵԱՀԿ Մինսկի խումբի գործընթացին՝ ընդգծելով ժողովուրդներու իրաւահաւասարութիւնն ու ինքնորոշման իրաւունքը, իբրեւ 2020-ի արիւնալի պատերազմէն ետք Ղարաբաղեան հակամարտութեան վերջնական լուծումը ուղղորդող երեք սկզբունքերէն մէկը:

Աւստրալիոյ Հայ Դատի յանձնախումբին եւ աւսրտալիահայ գաղութի նամակին պատասխանելով՝ նախարար Փէյն ողջունած է ռազմական գործողութիւններու դադարումը՝ միաժամանակ ընդգծած, որ երկու կողմերն ալ պէտք է պահպանեն Հելսինկիի Եզրափակիչ որոշումին դրոյթները՝ ուժի կամ անոր սպառնալիքի չկիրառումը, տարածքային ամբողջականութիւնն ու ժողովուրդներու իրաւահաւասարութիւնն ու ինքնորոշման իրաւունքը:

Նախարար Փէյն նաեւ կոչ ըրած է ինչպէս Հայաստանին, այնպէս ալ Ազրպէյճանին աջակցելու Եւրոպայի անվտանգութեան եւ համագործակցութեան կազմակերպութեան (ԵԱՀԿ) Մինսկի խումբի ջանքերուն՝ տարածաշրջանին մէջ խաղաղութիւն հաստատելու համար: Մինչ այժմ Հայաստանը պատրաստակամութիւն յայտնած է մասնակցելու այս գործընթացին, մինչդեռ Ազրպէյճանի բռնապետ Իլհամ Ալիեւը փորձած է շրջանցել եւ ծաղրել ԵԱՀԿ Մինսկի խումբը՝ նշելով, թէ ինչ որ իրենք չեն կրցած ձեռք բերել բանակցութիւններու միջոցով, ձեռք բերած են ռազմական ուժի միջոցով:

Հայ Դատի Աւստրալիոյ յանձնախումբի գործադիր տնօրէն Հայկ Կայսերեան կը նկատէ. «Աւստրալիահայ համայնքին համար կարեւոր է, որ ԵԱՀԿ Մինսկի խումբը, համանախագահ երեք երկիրներով, գլխաւորէ Լեռնային Ղարաբաղի մէջ խաղաղութիւն հաստատելու բանակցութիւնները, եւ խիստ կարեւոր է, որ Արցախի Հանրապետութեան բնիկ հայերու կողմէն իրացուած ինքնորոշման իրաւունքը այս գործընթացին մէջ յարգուի: Ատիկա պէտք է սկսի ռազմական եւ քաղաքացիական բոլոր գերիներու վերադարձով, որոնց Ազրպէյճանը կը շարունակէ պահել եւ խոշտանգել, ինչպէս նաեւ Լեռնային Ղարաբաղի մէջ ազրպէյճանական գրաւող ուժերը պէտք է փոխարինուին խաղաղապահ ուժերով, նախքան Ալիեւին թոյլ տրուի աւարտին հասցնել գրաւեալ տարածքներու մէջ հին հայկական բնիկ մշակութային եւ կրօնական յուշարձաններու դիտաւորեալ ոչնչացումը: Քոսովոյի եւ Արեւելեան Թիմորի նմանութեամբ Աւստրալիան պէտք է սատարէ այս հարցով պատմականօրէն արդար կողմին եւ նախարար Փէյն իր նամակին միջոցով նախանշած է այդ ճանապարհը:

«Վերջերս աւելի քան 3000 աւստրալացիներ ստորագրած են Աւստրալիոյ խորհրդարանին ուղղուած խնդրագիր, որմով կոչ կ՝ընեն ճանչնալ Արցախի Հանրապետութիւնը, իբրեւ տարածաշրջանի բնիկ հայերու անվտանգութիւնը ապահովելու միակ միջոց»:

ՀՅԴ Բիւրոյի Հայ Դատի Կեդրոնական Գրասենեակ