ՀՅԴ Արեւմտեան Ամերիկայի Շրջանային Ժողովը Խոստացաւ Աւելիով Զօրակցիլ Հայ Զինուորին Եւ Անոր Ընտանիքին

Հայաստան, Սփիւռք

Հայ Յեղափոխական Դաշնակցութեան Արեւմտեան Ամերիկայի Շրջանային 55րդ ժողովին, Արցախի պատերազմին հետեւանքները քննարկման գլխաւոր նիւթը դարձան։

Ժողովը միաձայնութեամբ որոշեց ընդարձակել Հայաստանի եւ Արցախի զինուորներուն եւ անոնց ընտանիքներուն ուղղուած աջակցութիւնները, յատուկ ծրագիրներու միջոցաւ, որպէսզի մեր նորօրեայ հերոսները կարենան յաղթահարել Արցախի նորագոյն պատերազմին պատճառած բազմաթիւ խոչընդոտները։

Բնականաբար, Հայաստանի, Արցախի եւ համայն հայ ժողովուրդին դիմագրաւած այս նորագոյն տագնապին տարողութիւնը բազմապատկուեցաւ վարչապետ Նիկոլ Փաշինեանի կողմէ 9 Նոյեմբերին ստորագրուած պարտուողական համաձայնութեան պատճառով։ Տխրահռչակ փաստաթուղթը կրցաւ կասեցնել ռազմական գործողութիւնները, սակայն ի գին Արցախի եւ Հայաստանի պատմական հողերու անընդունելի յանձնումին։

Արդէն իսկ ականատես դարձանք ոչ միայն պատմական Արցախի Քարվաճառի, Բերձորի եւ Շուշիի շրջանները, այլ նաեւ Հայաստանէն կարեւոր դիրքերու յանձնումներուն, որոնք մեր հայրենիքի քոյրերուն եւ եղբայրներուն դիմագրաւած իրավիճակը աւելիով կը բարդացնեն։

Շրջանային ժողովը նաեւ վերահաստատեց նախորդ Կեդրոնական կոմիտէի այն յայտարարութիւնը, որուն մէջ կը դատապարտուէր Հայաստանի, Ատրպէյճանի եւ Ռուսիոյ կառավարութիւններուն միջեւ 9 Նոյեմբերին գոյացած համաձայնագիրը, որ դաւաճանութիւն է հայ ժողովուրդի ապահովութեան եւ իրաւունքներուն։ Ժողովը նաեւ յստակօրէն շեշտեց, թէ վարչապետ Նիկոլ Փաշինեանի գլխաւորած Հայաստանի ներկայ կառավարութիւնը գլխաւոր պատասխանատուն է համաձայնութեան ստորագրութեան հետեւանքով յառաջացած տագնապին։ Ժողովը հասաւ այն եզրակացութեան, որ, համահունչ մեր կազմակերպական ուղիին, յաւելեալ վնասներու առաջքը առնելու լաւագոյն միջոցն է վարչապետին անյապաղ հրաժարիլը եւ Ազգային համախոհութեան կառավարութեան կազմութիւնը, որ պիտի ստանձնէ արտակարգ խորհրդարանական ընտրութիւններ կազմակերպելու պարտականութիւնը։ Այն անձը, որուն ստորագրութիւնը կայ նշեալ աղէտալի փաստաթուղթին տակ, չի կրնար մեր ազգը դուրս բերել այս ճգնաժամէն։

Շրջանային ժողովը նաեւ շեշտեց, թէ Արեւմտեան Ամերիկայի մէջ հայութեան բոլոր կարելիութիւնները պէտք է միացնել, ոչ միայն աւելի նպաստաւոր կերպով աջակցելու համար մեր հայրենիքին, այլ նաեւ աւելի ամուր հիմերու վրայ դնելու համար Սփիւռք-Հայաստան յարաբերութիւնները։ Դաշնակցային, նահանգային եւ տեղական կառավարման մարմիններու կողմէ Արցախի ճանաչումը ջատագովելու եւ Հայաստանին յաւելեալ աջակցութիւն ապահովելու կարեւոր աշխատանքները աւելիով պիտի արդիւնաւորուին նման համագործակցութեամբ։

Աւարտին, Շրջանային ժողովը ընտրեց ՀՅԴ Արեւմտեան Ամերիկայի Կեդրոնական կոմիտէի նոր կազմը, բաղկացած յետեւեալ անդամներէ, որ պիտի ստանձնէ յառաջիկայ երկու տարիներուն կուսակցութիւնը առաջնորդելու պարտականութիւնը։

Սագօ Պէրպէրեան
Վահան Պզտիկեան
Շահէն Տէրտէրեան
Կարօ Իսբէնճեան
Թորոս Քէջէճեան
Արթօ Քէոլեան
Լեւոն Կիրակոսեան
Յարութ Մկրտիչեան
Քարմէն Օհանեան
Ալիք Ուրֆալեան
Գօգօ Թօփալեան

ՀՅԴ Արեւմտեան Ամերիկայի 55րդ Շրջանային Ժողով
28 Դեկտեմբեր 2020
Մոնթեպելլօ, Քալիֆորնիա