Վաղը Կապանի եւ 13 Գիւղերու Բարձունքները Ազրպէյճանին Պիտի Յանձնուին․ Կապանի Քաղաքապետ

Աշխարհ, Հայաստան

Այսօր առաւօտեան ՀՀ պաշտպանութեան նախարարութենէն հրահանգուած է Կապանի ներկայ պաշտպանական դիրքերը Ազրպէյճանին յանձնելու մասին։ Կապանի համայնքապետ Գէորգ Փարսեան Hetq-ի հետ զրոյցին ընթացքին նշած է, որ վաղը մինչեւ ժամը 17։00 պէտք է դուրս գան դիրքերէն։ «Ես կը մտածէի, որ այս իշխանութիւնները մեզի պիտի հասցնեն այս հանգուցալուծման։ Այդպիսի մտավախութիւններ ունէի»,- յայտնած է համայնքապետը:

Վաղուընէ Ազրպէյճանի վերահսկողութեան տակ պիտի ըլլան այն դիրքերը, որոնք կ՝ապահովեն Կապանի եւ մօտակայ 13 գիւղերու անվտանգութիւնը։ Ըստ համայնքապետի՝ անոնք են Դաւիթ Բեկ, Կաղնուտ, Ուժանիս, Եղվարդ, Ագարակ, Դիցմայրի, Սիւնիք, Գեղանուշ, Ճակատեն, Շիկահող, Ներքին Հանդ, Ծաւ գիւղերը եւ Կապան քաղաքը, որոնք բոլորը կը մտնեն Կապան համայնքին մէջ։ Ի դէպ՝ Կապան քաղաքի ոչ բնակելի հատուածի հեռաւորութիւնը սահմանէն պիտի ըլլայ 100 մեթր, իսկ բնակելի հատուածէն՝ 1 քմ։

«Այս բոլոր տարածքները մինչեւ 1929 թ․ եղած են հայկական տարածքներ։ 1929 թ․ անոնք տրուած են Ազրպէյճանին։ Այդ տարածքներուն մէջ ներառուած է 21 գիւղ։ Եւ ինչո՞ւ պիտի սահմանազատումը ըլլայ 1974-ի քարտէզով, այլ ոչ թէ, օրինակ, 1929-ի»,- ըսած է համայնքապետը։

Ներկայիս Գորիս-Կապան-Մեղրի ճանապարհի որոշ հատուածներ կ՝անցնին այնպիսի տարածքներով, որոնք կա՛մ պէտք է անցնին ազրպէյճանական վերահսկողութեան տակ, կա՛մ յայտնուին անմիջական սահմանի վրայ։