Բերիոյ Հայոց Թեմի Առաջնորդը Իր Զօրակցութիւնը Յայտնեց Լիբանանի Հայոց Թեմի Առաջնորդին

Սփիւռք

Հինգշաբթի, 6 Օգոստոս 2020-ի առաւօտուն, Բերիոյ Հայոց Թեմի Առաջնորդ Գերշ. Տ. Մասիս Սրբ. Եպս. Զօպուեան նամակով եւ հեռաձայնային կապ հաստատելով Լիբանանի Հայոց Թեմի Առաջնորդ Գերշ. Տ. Շահէ Ս. Արք. Փանոսեանի հետ, Թեմի ժողովականութեան եւ ժողովուրդին անունով իր խորազգաց վշտակցութիւնը եւ անսակարկ զօրակցութիւնը յայտնեց Լիբանանի Հայոց Թեմին եւ Լիբանանի հայ համայնքին, ի տես Լիբանանի նաւահանգիստին մէջ տեղի ունեցած աղէտալի պայթումին, որուն հետեւանքով լիբանանահայութիւնը ունեցաւ մարդկային զոհեր եւ նիւթական ահռելի վնասներ:

Սրբազան Հայրը հաստատեց, թէ Լիբանանի եւ Սուրիոյ ժողովուրդները տարիներ շարունակ երկու քոյր երկիրներու մէջ համագոյակցութեամբ ապրող եղբայրներ են, իսկ Լիբանանահայութիւնը հայ ժողովուրդի կեանքէն ներս առանցքային դեր կը կատարէ եւ մեծ ներդրում կը բերէ մեր համազգային շահերու իրականացման ի խնդիր:

Մատնանշելով անցնող տարուան ընթացքին լիբանանահայութեան դիմագրաւած իրերայաջորդ մարտահրաւէրները՝ քաղաքական անկայունութիւնը, ընկերային-տնտեսական ճգնաժամը, պսակաձեւ ժահրի տարածումը, Սրբազան Հայրը նշեց, թէ վերջին պայթումը եկաւ ցնցելու ողջ լիբանանահայութիւնը: Լիբանանի Հայոց Թեմը եւ Լիբանանի ազգային կառոյցները անմասն չմնացին նիւթական ահռելի վնասներէն, սակայն Ամենակալ Աստուած անտէր չի ձգեր իրեն յուսացող զաւակները:

Առաջնորդ Սրբազան Հայրը խորազգաց ցաւակցութիւններ յայտնեց պայթումին զոհուած հայորդիներու ընտանիքներուն, շուտափոյթ ապաքինում մաղթեց բոլոր վիրաւորներուն եւ համբերութիւն՝ Լիբանանի մեր ժողովուրդի զաւակներուն, Թեմի Հոգեւորականաց Դասուն եւ ազգային մարմիններուն:

Մասիս Եպիսկոպոս աղօթք բարձրացնելով առ Աստուած, մաղթեց, որ շուտով փարատին սեւ ամպերը Լիբանանի երկնակամարէն, խաղաղութիւնը հաստատուի անոր սահմաններէն ներս եւ Լիբանանի Հայոց Թեմի ժողովականութիւնն ու ժողովուրդը աստուածային նախախնամութեամբ պայծառ օրեր ապրին: