Հերոսաբար Նահատակուած Մեր Սպաներն ու Զինուորները Անմահ Են Իրենց Ծառայութեան Սխրանքով. Ամենայն Հայոց Կաթողիկոսը Ներկայ Գտնուեցաւ Զոհուած Սպայի Յուղարկավորութեան Արարողութեան

Հայաստան

Յուլիս 16-ին Ն.Ս.Օ.Տ.Տ. Գարեգին Բ Ամենայն Հայոց Կաթողիկոսը ՀՀ ԶՈւ հոգեւոր առաջնորդ Տ․ Վրթանես եպիսկոպոս Աբրահամեանի եւ Մայր Աթոռի միաբաններու ուղեկցութեամբ այցելեց «Եռաբլուր» զինուորական պանթէոն, ուր նախագահեց Տաւուշի մէջ հայ-ատրպէյճանական սահմանին տեղի ունեցած մարտական գործողութիւններուն ընթացքին զոհուած փոխ գնդապետ Գարուշ Համբարձումեանի յուղարկաւորութեան արարողութիւնը։ Այս մասին ԵՌԱԳՈՅՆ-ը կը տեղեկանայ Մայր Աթոռ Սուրբ Էջմիածինի պաշտօնական կայքէջէն։

Եկեղեցւոյ կարգէն ետք՝ Վեհափառ Հայրապետը իր վշտակցութեան խօսքը ուղղեց արարողութեան մասնակից ՀՀ Վարչապետ Նիկոլ Փաշինեանին, Պաշտպանութեան նախարար Դաւիթ Տօնոյեանին, զոհուած սպայի սգակիր ընտանիքին, հարազատներուն եւ ողջ մեր ժողովուրդին։