Սահմանադրութեան Նկատմամբ Յարգանքը Իրաւունքի Գերակայութեան Սկզբունքի Հիմնական Պահանջ Է. Պուքիքիօ

Աշխարհ, Հայաստան

Վենետիկի յանձնաժողովի նախագահ Ճիանի Պուքիքիոն Հայաստանի Սահմանադրական դատարանի նախկին նախագահ Հրայր Թովմասեանին յղուած պատասխան նամակին մէջ նշած է, որ սահմանադրութեան նկատմամբ յարգանքը իրաւունքի գերակայութեան սկզբունքի հիմնական պահանջ է. «Ես կրնամ միայն կոչ ուղղել` յարգելու Սահմանադրութիւնը: Անիկա կը հանդիսանայ իրաւունքի գերակայութեան սկզբունքի հիմնարար պահանջ»,- շեշտած է Վենետիկի յանձնաժողովի նախագահը իր նամակին մէջ:

Ճիանի Պուքիքիոն  դիտել տուած է, որ ուշադրութեամբ կը հետեւի Հայաստանի մէջ սահմանադրական փոփոխութիւններուն վերաբերող զարգացումներուն: Ան ափոսանք յայտնած է, որ անոնք չեն կատարուած Վենետիկի յանձնաժողովի առաջարկներուն համապատասխան:

ԲՀԿ-ը Դիմում Ներկայացուց
Սահմանադրական Դատարանին

Սահմանադրական վերջին փոփոխութիւնները հակասահմանադրական համարող Ազգային ժողովի «Բարգաւաճ Հայաստան» խմբակցութիւնը դիմեց Սահմանադրական դատարան: Խմբակցութեան քարտուղար Արման Աբովեան տեղեկացուց, որ խմբակցութեան իր գործընկերներէն բացի, միացած է նաեւ անկախ պատգամաւոր Տիգրան Ուրիխանեանը:

Յիշեցնենք, որ «Լուսաւոր Հայաստան»-ը աւելի կանուխ յայտնած էր, որ ներկայիս չի միանար Սահմանադրական դատարան դիմելու նախաձեռնութեան, այլ պիտի դիմէ երկրորդ նախագահ Ռոպերթ Քոչարեանի գործով քննութեան աւարտէն ետք: