Հայաստան Կ՝աջակցի Համաշխարհային Հրադադարի Կոչին. Զոհրապ Մնացականեան

Աշխարհ, Հայաստան

Հայաստան ամբողջական աջակցութիւն կը յայտնէ ՄԱԿ-ի ընդհանուր քարտուղար Անթոնիօ Կութիերեշի աշխարհի ամբողջ տարածքին համաշխարհային զինադադարի կոչին: Այս մասին Twitter-ի իր էջին վրայ գրած է Հայաստանի արտաքին գործոց նախարար Զոհրապ Մնացականեան:

«Հայաստանը լիակատար աջակցութիւն կը յայտնէ ՄԱԿ-ի գլխաւոր քարտուղար Անթոնիօ Կութիերեշի կոչին՝ մինչ ողջ մարդկութիւնը կը պայքարի ընդդէմ ընդհանուր թշնամիի՝ COVID-19-ի, աշխարհի բոլոր անկիւններուն մէջ հաստատել համաշխարհային հրադադար»,- կը յայտնէ Մնացականեան:

Կութիերեշ իր տեսաուղերձին մէջ յատկապէս կը յայտնէ, որ ժամանակն է զինեալ բախումները մէկ կողմ դնելու եւ միասին կեդրոնանալու կեանքի իրական պայքարին վրայ` «Քորոնա» ժահրին դէմ։  Ան նկատել կու տայ, որ ժահրը նկատի չ՛առներ ցեղային, ազգային կամ այլ պատկանելութիւն, այլ անիկա անողոքաբար կը յարձակի բոլորին վրայ: «Մինչ աշխարհի մէջ զինեալ հակամարտութիւններ տեղի կ՛ունենան, աւելի խոցելիները` կիները, երեխաները, հաշմանդամութիւն ունեցող անձեր կը վճարեն ամէնէն սուղ գինը: Անոնք ենթակայ են այս ժահրի մեծագոյն վտանգին: Չմոռնանք, որ պատերազմէն տուժած երկիրներուն մէջ առողջապահական համակարգերը փուլ կու գան: Գաղթականները, տեղահանուածները կրկնակիօրէն խոցելի են: Վերջ տուէք պատերազմին եւ եկէք պայքարինք այն հիւանդութեան դէմ, որ կը փճացնէ մեր աշխարհը: Այդ իսկ պատճառով ես այսօր կոչ կ՛ուղղեմ՝ անյապաղ համաշխարհային զինադադար հաստատելու աշխարհի բոլոր անկիւններուն մէջ»,- յայտարարեց ՄԱԿ-ի ընդհանուր քարտուղարը։