Թեհրանի Մէջ Բացուած է «Իրանահայեր» Ցուցահանդէսը

Սփիւռք

Իրանի Իսլամական Հանրապետութեան մայրաքաղաք Թեհրանի մէջ բացուած է «Իրանահայեր» ցուցահանդէսը, ուր ցուցադրուած են լուսանկարչական, քանդակագործական եւ արուեստի այլ տեսակներու նմուշներ:

Ինչպէս կը յայտնէ Payvand լրատուականը, «Մեհրսուն» պատկերասրահին մէջ բացուած  ցուցահանդէսին ներկայացուած են Իրանի հայկական համայնքի արուեստագէտներու` էստամպի, լուսանկարչութեան եւ քանդակագործութեան աշխատանքներ, ինչպէս նաեւ հայ համայնքի ականաւոր երաժիշտներու եւ կատարողական արուեստի ներկայացուցիչներու կեանքը, ստեղծագործութիւններն ու անոնց դերակատարումը Իրանի արուեստի զարգացման մէջ:

Փետրուար 14-ին ցուցահանդէսի բացման ներկայ էին Իրանի մէջ ՀՀ արտակարգ եւ լիազօր դեսպան Արտաշէս Թումանեան, Թեհրանի Հայոց թեմի առաջնորդ Տ. Սեպուհ Արքեպիսկոպոս Սարգսեան, Իրանի երաժշտական թանգարանի տնօրէն Ալի Մօրադխանին եւ Իրանի նկարիչներու միութեան նախագահ Մաճիտ Ռաճապի-Մեմարը:

Արարողութեան ժամանակ դեսպան Թումանեան նշած է, որ ցուցահանդէսը կ՛արտացոլէ Հայաստանի եւ Իրանի երկու ժողովուրդներու միջեւ յարաբերութիւններու խորութիւնը: Իր ելոյթին մէջ Թեհրանի հայոց թեմի առաջնորդ Տ. Սեպուհ Սարգսեան նշած է, որ ցուցահանդէսը ցոյց կու տայ Իրանի եւ Հայաստանի ժողովուրդներու դարաւոր բարեկամութիւնը եւ աւելցուցած, որ ցուցահանդէսը երկու ժողովուրդներու երկխօսութիւնն է արուեստի միջոցով:

Ցուցահանդէսին ներկայացուած են Էդմոն Այվազեանի, Զաւէն Այվազեանի, Սիմոն Այվազեանի, Ռազմիկ Օհանեանի, Ադիկ Պողոսեանի, Ալպերթ Պիգջանիի, Լիլիթ Տէրեանի, Լորիս Ճգնաւորեանի, Գառնիկ Տէր Յակոբեանի, Սմբատ Տէր Կիւրեղեանի, Էդնա Զինալեանի, Վարհամ Սահակեանի, Սիրակ Մելքոնեանի, Ադենա Միրզախանեանի, Լեւոն Հաֆթուանի, Երուանդ Նահապետեանի, Սեդրակ Նազարեանի եւ այլոց աշխատանքները:

«Իրանահայեր» ցուցահանդէսը կազմակերպուած է Իրանի մէջ ՀՀ դեսպանատան, Իրանի հայկական համայնքի, Թեհրանի հայոց թեմի առաջնորդարանի եւ «Մանուկեան” թանգարանի համագործակցութեան արդիւնքով: