ՀՅԴ Գիտաժողով` Նուիրուած Արցախ Վերադարձի 30-ամեակին

Հայաստան, Սփիւռք

Ստեփանակերտի մէջ, Փետրուար 13-ին, կայացած է «Հայ Յեղափոխական Դաշնակցութիւն»կուսակցութեան Արցախ վերադարձի 30-ամեակին նուիրուած միջազգային գիտաժողով:

Ըստ Artsakhpress.am-ի՝ գիտաժողովի բացումէն առաջ՝ մասնակիցները ներկայ եղած են «ՀՅԴ-ն Արցախի մէջ. յետադարձ հայեացք» խորագրով ցուցահանդէսի բացման, ուր ներկայացուած էին դաշնակցականներ Արթուր Մկրտչեանի եւ Աշոտ Ղուլեանի (Բեկոր Աշոտ) իրերը, ինչպէս նաեւ ՀՅԴ առաջին պաշտօնական դրօշը, առաջին ծրագիրը, կանոնագիրը, զանազան գրութիւններ, արձանագրութիւններ:

Այնուհետեւ տեղի ունեցած է միջազգային գիտաժողովին բացումը, որուն ողջոյնի խօսքով հանդէս եկած է ՀՅԴ Արցախի Կեդրոնական կոմիտէի ներկայացուցիչ Դաւիթ Իշխանեան: Ան բարի ընթացք մաղթած է գիտաժողովի աշխատանքներուն եւ նշած, որ անիկա միջոց է անցեալը կրկին արժեւորելու, ներկայ ու ապագայ ընելիքներուն շուրջ խորհրդածելու համար:

«ՀՅ Դաշնակցութեան պատմութիւնը անքակտելի կապերով միահիւսուած է հայ ժողովուրդի անցեալի ու ներկայի պատմութեան: Արցախը Դաշնակցութեան կենարար զարկերակն է, անիկա կը սնուցանէ կուսակցութեան նպատակները, անիկա գաղափարախօսութիւն է եւ անշեղելի ՀՅԴ որդեգրած ուղիէն: Յոյսով եմ` գիտաժողովը դարձեալ պիտի համախմբէ մեր միտքն ու գործը` յանուն այն ապագային, որուն դաւանողը միայն Դաշնակցութիւնը չէ, այլ իւրաքանչիւրը, որ մտահոգ ու պատրաստակամ է անցածը անաչառօրէն արժեւորելու եւ ապագայի համար ամուր հիմքեր կառուցելու գործին»,- մասնաւորապէս նշած է Դ. Իշխանեան:

Այնուհետեւ կայացած է գիտաժողովի լիագումար նիստը, որուն ընթացքին մասնակիցները անդրադարձած են Արցախի պետականութեան վերակերտման գործին, ինչպէս նաեւ Արցախեան ազատագրական շարժման մէջ ՀՅԴ տեղին ու դերին, 1905-1906թթ հայ-թաթարական ընդհարումներու ժամանակ հայութեան ինքնապաշտպանութիւնը կազմակերպելու գործին մէջ ունեցած «Դաշնակցութեան» դերակատարութեան եւ այլն: Լիագումար նիստի աւարտին գիտաժողովի մասնակիցները ամփոփած են արդիւնքները: