Իսրայէլական Մամուլն Արձագանգած է Հայաստանի Նախագահ Արմէն Սարգսեանի Այցին Իսրայէլ

Աշխարհ, Հայաստան

Իսրայէլական մամուլը իր վերջին օրերու հրապարակումներուն մէջ անդրադարձած է Հայաստանի Հանրապետութեան նախագահ Արմէն Սարգսեանի` Իսրայէլի Պետութիւն աշխատանքային այցին, որու ծիրէն ներս Հանրապետութեան նախագահը մասնակցած է Հոլոքոսթի յիշատակին նուիրուած 5-րդ միջազգային համաժողովին:

Մասնաւորապէս` առաջատար The Jerusalem Post օրաթերթը կը գրէ, որ Իսրայէլի մայրաքաղաք այցելած առաջնորդներու շարքին էր նաեւ Հայաստանի Հանրապետութեան նախագահ Արմէն Սարգսեան, որ առաջին անգամ կ՛այցելէ Իսրայէլ որպէս ՀՀ նախագահ: Պաշտօնական ձեռնարկներէն եւ Իսրայէլի ղեկավարութեան հետ հանդիպումներէն բացի, Հայաստանի նախագահը այցելած է նաեւ Հոլոնի արհեստագիտական համալսարան, ուր ակադեմիական համագործակցութեան զարգացման մասին փոխըմբռնման յուշագիր ստորագրուած համալսարանի նախագահ Էդուարդ Հակուբովի հետ:

«Արմենփրես»-ի հաղորդմամբ` պարբերականը մէջբերած է հատուած մը համալսարանին մէջ նախագահ Սարգսեանի ելոյթէն. «Պատմութեան շատ էջեր ողբերգական են հայ եւ հրեայ ժողովուրդներուն համար: Մենք կը սգանք եւ կը յիշենք մահը բոլոր այն միլիոնաւոր մարդոց, որոնք զրկուած են իրենց կեանքէն Հոլոքոսթի եւ Հայոց Ցեղասպանութեան ժամանակ»:

Օրաթերթը տեղեկացուցած է նաեւ համալսարանին մէջ Հայաստանի նախագահին ներկայացուցած` «Աշխարհաքաղաքական իրողութիւնները արհեստական բանականութեան դարաշրջանին մէջ» թեմայով դասախօսութեան մասին:

Հայաստանի նախագահը բացառիկ հարցազրոյց տուած է նաեւ Իսրայէլի հանրային հեռարձակող ընկերութեան, եւ խօսելով Հայոց Ցեղասպանութեան ճանաչման  մասին, ըսած է. «Ես կը ճանչնամ շատ հրեայ քաղաքական գործիչներ, որոնք կը սատարեն ճանաչման գործընթացին: Ես չեմ տեսներ որեւէ պատճառ, թէ ինչու Իսրայէլի խորհրդարանը պէտք չէ ճանչնայ Հայոց Ցեղասպանութիւնը: Եթէ պատճառը ներկայիս քաղաքական շահերը, քաղաքական յարաբերութիւնները կամ ապագայի քաղաքական, թերեւս, նաեւ տնտեսական շահերն են, ատիկա զիս շատ կը տխրեցնէ, քանի որ Հոլոքոսթի եւ Հայոց Ցեղասպանութեան դասերը մեզի կը սորվեցնեն, որ չկայ որեւէ բան, յանուն որուն կարելի է զիջիլ` թոյլ տալով, որ նման դէպքերը դարձեալ կրկնուին»: