Հայերու Բնաջնջման Կամ Բռնագաղթեցման Նոր Փորձերու Հնարաւորութիւն Պիտի Չտանք. Նիկոլ Փաշինեանի Ուղերձը Պաքուի Ջարդերու 30-ամեակին Առիթով

Հայաստան

Հայաստանի Հանրապետութեան վարչապետ Նիկոլ Փաշինեան ուղերձ յղած է Պաքուի հակահայկական ջարդերու 30-րդ տարելիցի կապակցութեամբ:  Վարչապետ Փաշինեան ըսած է, որ անցած երեք տասնամեակը Ատրպէյճանի մէջ չէ դարձած վերաիմաստաւորման, զղջումի եւ հաշտութեան հասնելու ժամանակաշրջան:

«Դէպքերէն 30 տարի անց Ատրպէյճանի մէջ գոյութիւն չունի Պաքուի հակահայկական ջարդերու զոհերու հանդէպ որեւէ յարգանք եւ կարեկցանք: Այն սակաւաթիւ ձայները, որոնք քաջութիւն ունեցած են նոյնիսկ գրական ստեղծագործութիւններու մէջ յիշատակել Պաքուի հայերուն բաժին հասած ողբերգութիւնը, գամուած են անարգանքի սիւնին եւ պաշտօնապէս հռչակուած դաւաճան»:

Վարչապետին խօսքով` հայատեացութիւնը դարձած է Ատրպէյճանի պետական քաղաքականութիւնը եւ հաւատամքը:

 «Այս ընթացքին ականատես եղած ենք Արցախի բնակչութեանը բնաջնջելու փորձին, մարդասպանութեան համար պատիժ կրող Ռամիլ Սաֆարովին ազատ արձակման եւ հերոսացման, 2016-ի Ապրիլին Արցախի սահմանամերձ բնակավայրու մէջ տարէց եւ անօգնական մարդոց դաժան խոշտանգման եւ սպանութեան»,- աւելցուցած է կառավարութեան ղեկավարը:

 Ան երախտագիտութիւն յայտնած է բոլոր միջազգային կառոյցներուն, որոնք արձագանգած են այս իրադարձութիւններուն` զանոնք դատապարտելով ու աշխարհին ի ցոյց դնելով:

 «Ես ամենայն պատասխանատւութեամբ կը յայտարարեմ` հայերու բնաջնջման կամ բռնագաղթեցման նոր փորձերու հնարաւորութիւն պիտի չտանք»,- իր խօսքը ամփոփած է Փաշինեան: