Ներկայ Թուրքիոյ Տարածքին Գտնուող Հայկական Բիւրակնի Մէջ 3 Հազարամեայ Հնութեամբ Ցորենի Հատիկներ Գտնուած են

Աշխարհ, Էրկիր

Հայկական Բիւրակնի մէջ (թրք․ անուանումը` Պինկէօլ-Ակունքի խմբ․) կատարուած հնագիտական պեղումներու շնորհիւ 3 հազար տարուան հնութեամբ ցորենի հատիկներ պեղուած են: Այդ մասին կը հաղորդէ Akunq.net-ը` վկայակոչելով թրքական «Ենի Շաֆաք» պարբերականը:

Աղբիւրին համաձայն՝ Թուրքիոյ Մշակոյթի եւ զբօսաշրջութեան նախարարութեան թանգարաններու գլխաւոր տնօրինութեան ղեկավարութեամբ Պինկէօլի Սօլհան գաւառի Մուրատ գիւղին մէջ գտնուող Նորիկ անուամբ հողաբլուրին վրայ դեռ անցեալ տարի սկսած պեղումները կը շարունակուին` «ֆըրաթ», «Եուզիւնճու Եըլ» եւ «Պինկէօլ» համալսարաններու մասնագէտներու մասնակցութեամբ:

Էլազըղի (Խարբերդ-Ակունքի խմբ․) թանգարանի տնօրէն Զիյա Քըլըչի ղեկավարած պեղումներուն կը մասնակցի 158 հոգինոց խումբ մը, որ գտած է ուրարտական եւ բիւզանդական ժամանակաշրջաններուն պատկանող բազմաթիւ իրեր, որոնց մէջ` 3 հազարամեայ հնութիւն ունեցող ցորենի հատիկներ:

«Ֆըրաթ» համալսարանի Ընկերաբանութեան բաժանմունքի հնագիտութեան բաժնի դասախօս Ապտուլքատիր Օզտեմիր լրատուամիջոցին յայտնած է, որ ցորենի տեսակը որոշելու նպատակով զայն պիտի ուղարկեն Միացեալ Նահանգներ գտնուող տարրալուծարան մը:

Յիշեցնենք, որ երկու տարի տեւած սոյն պեղումներուն ատեն յայտնաբերուած է 3․600 տարուան հնութիւն ունեցող ուրարտական բնակավայր մը, ինչպէս նաեւ` բիւզանդական դարաշրջանի բազմաթիւ գտածոներ: