Թուրքիոյ Խումբ Մը Քաղաքացիներ Խորհրդարանէն Կը Պահանջեն Հակազդել Հայոց Ցեղասպանութեան Բանաձեւերու Ընդունման

Աշխարհ, Հայաստան, Սփիւռք

Թուրքիոյ խումբ մը քաղաքացիներ դիմում ներկայացուցած են խորհրդարան եւ պահանջած պատասխան տալ տարբեր երկիրներու խորհրդարաններուն մէջ Հայոց Ցեղասպանութեան մասին բանաձեւերու ընդունման։ Այս մասին կը հաղորդէ Ermenihaber.am-ը՝ վկայակոչելով Milliyet-ը։

Խորհրդարանէն պահանջուած է «գործի անցնիլ, քանի որ թուրք քաղաքացիները «անպաշտպան մնացած են՝ ենթարկուելով ֆիզիքական եւ հոգեբանական ճնշումներու»:

Ըստ թրքական աղբիւրին՝ խորհրդարան ներկայացուած դիմումին մէջ ներառուած է քանի մը կէտ։

Կէտերէն մէկուն մէջ կ՝ըսուի, որ ցեղասպանութեան մասին բանաձեւերուն ընդունումով «կը թիրախաւորուի թուրք ժողովուրդը, ինչպէս նաեւ առհասարակ ցեղասպանութիւն չընդունողները»։

Միւս կէտին մէջ կ՝ըսուի, որ նշեալ բանաձեւերով կը խախտուին Թուրքիոյ քաղաքացիներուն իրաւունքները, աւելցնելով, որ Հայոց Ցեղասպանութեան մասին բանաձեւերը ուղղակիօրէն «կը թիրախաւորեն խօսքի եւ մտքի ազատութիւնը»:

Այդ կէտին մէջ նաեւ կ՝ըսուի, որ այդ բանաձեւերը կ՝անտեսեն «օսմանեան ժողովուրդներ»ու, մասնաւորապէս «թուրք ժողովուրդի կոտորածները նախորդ դարուն», կը շեղին ընդհանուր ցաւի գաղափարէն՝ թիրախաւորելով թուրքերն ու Թուրքիոյ քաղաքացիները»:

Երրորդ կէտով կ՝ըսուի, որ Թուրքիոյ խորհրդարանը մինչ օրս համաչափ պատասխան չէ տուած Իտալիոյ, Ֆրանսայի խորհրդարաններուն՝ Հայոց Ցեղասպանութիւնը դատապարտող որոշումներուն։

Դիմումը ներկայացուցած քաղաքացիները Թուրքիոյ իշխանութիւններէն պահանջած են յստակ քայլեր ձեռնարկել այս հարցին շուրջ։