Արցախի Անվտանգութեան Խորհուրդի Քարտուղարը Հեռացուեցաւ Իր Պաշտօնէն

Հայաստան

Յունիս 11-ին, նախագահ Բակօ Սահակեանի ստորագրած հրամանագիրով՝ Վիտալի Բալասանեան ազատուեցաւ Արցախի Հանրապետութեան Անվտանգութեան խորհուրդի քարտուղարի պաշտօնէն:

Արցախի նախագահի մամլոյ խօսնակ Դաւիթ Բաբայեան «Թերթ»-ին յայտնեց, որ Բալասանեանի պաշտօնանկութեան պատճառը նախագահական ընտրութիւններուն մասնակցելու անոր մտադրութիւնն է, որուն համար ան պիտի ձեռնարկէ քարոզարշաւի:

«Որքանով ես տեղեակ եմ՝ պատճառը այն է, որ Վիտալի Բալասանեանը մասնակցելու է նախագահական ընտրութիւններին: Նա յայտարարել է, որ թեկնածու է, քարոզարշաւ է իրականացնելու», յայտնեց Բաբայեան՝ աւելցնելով, որ ճիշդ չէ անոր պաշտօնանկութիւնը կապել Հայաստանի իշխանութեանց ճնշումներուն հետ:

Նշենք, որ «168 ժամ»-ը գրած էր հետեւեալը. «Մեր տեղեկութիւններով՝ ՀՀ վարչապետ Նիկոլ Փաշինեան Արցախի իշխանութիւններուն, մասնաւորապէս՝ նախագահ Բակօ Սահակեանի առջեւ դրած է Արցախի Անվտանգութեան խորհրդի քարտուղար Վիտալի Բալասանեանէն ազատուելու հարցը: Մեր աղբիւրներուն հաւաստմամբ՝ նախօրէին Բակօ Սահակեան իր մօտ հրաւիրած է Վիտալի Բալասանեանը եւ առաջարկած է ազատման դիմում գրել: Անիկա ներկայացուած է՝ որպէս ՀՀ իշխանութիւններու կողմէ ներկայացուած պահանջ»: