Յանցագործներու Տեղը Բանտն է Բայց Արդարութիւնը Բոլորի Համար Հաւասար Պէտք է Ըլլայ. Տարօն Տօնոյեան

Հայաստան

Այսօր ՀՅԴ-ի հրաւիրուած հանրահաւաքին ելոյթ ունեցաւ ՀՅԴ ԳՄ անդամ, բժիշկ, ազատամարտիկ Տարօն Տօնոյեան: Ան նշեց, որ անցեալ տարի Ապրիլին, երբ սկսաւ ժողովրդային շարժումը, ՀՅԴ-ն ողջունեց այն, շարժում, որ պիտի տանէր դէպի սիրոյ եւ հանդուրժողականութեան, միասնութեան հանգրուան: Եւ այդ միասնութեամբ պէտք է հզօր եւ ուժեղ դարձնէր Հայաստանը: Այս մասին կը յայտնէ Երկիր.am-ը

«Կարճ ժամանակ անց մեզ մօտ սկսեցին կասկածներ առաջանալ: Հիմա այլեւս կասկածելու բան չունենք, չկայ սէր եւ հանդուրժողականութիւն, կայ բացայայտ ատելութեան մթնոլորտ: Արհեստականօրէն ստեղծուած այդ ատելութեան մթնոլորտը սերմանւում է ոչ թէ իշխանութիւնների յայտարարուած հակայեղափոխականների, այլ հէնց իշխանութիւնների կողմից: Դա արւում է մտածուած: Յայտարարել ենք, որպէս Դաշնակցութիւն, եւ այսօր յայտարարում ենք` Դաշնակցութիւնն ունի իր օրակարգը: Մեր օրակարգն է` լինել առանցքային ընդդիմութիւն, որը շտկելու է իշխանութեան սխալները, թոյլ չի տալու Ռուբիկոնն անցնել: Այսօր մենք եկել ենք դեղին քարտերով:

Դաշնակցութիւնը դաւադրաբար չի նստում ու սպասում, որ ձախողուի այս իշխանութիւնը, քանի որ այդ ձախողումը մեր ժողովրդի, պետութեան ձախողումն է: Մենք` որպէս 130-ամեայ փորձառութիւն ունեցող, պատերազմներով ու դժնդակ օրերով անցած փորձառու քաղաքական կուսակցութիւն, կոչ ենք անում մեր իշխանութիւններին` լրջանալ: Մենք ասում ենք` անցեալին վերադարձ չկայ, անցեալը յետընթաց է, մենք առաջ ենք նայում: Այսօր մեր առաջընթացի գրաւականը մեր միասնութիւնն է: Սակայն այսօր բաժանարար գծերը, թշնամութեան մթնոլորտը բզկտում են մեր հայրենիքը: Ամենակարեւորը` վտանգւում է մեր հայրենիքի, մեր ժողովրդի ու Դաշնակցութեան սրբութեան սրբոցը` Արցախը: Դաշնակցութիւնը խիստ անյանգստացած է Արցախի հարցով մեր իշխանութիւնների վարած քաղաքականութիւնից: Մեզ համար խիստ անհասկանալի է եւ վտանգաւոր, երբ ժողովրդի լրջագոյն քուէ ստացած իշխանութիւնների կողմից յայտարարւում է, թէ «ինձ մեսիջներ արէք, որ ես իմանամ` ինչպէս բանակցել»:

Սա «անհասկանալի՞» որակել, «ծիծաղելի՞» որակել, թէ՞  «թիւրիմացութիւն» որակել` ժամանակը ցոյց կը տայ: Լրջացէ’ք, ընկերնէ’ր: Այսօր մտածուած ձեւով կեղծ օրակարգ է նետուել պետութեան մէջ` հակայեղափոխութեան վտանգի գաղափարի ձեւով: Չկայ հակայեղափոխութիւն, չի կարող լինել մի երկրում, ուր իշխանութիւններն ունեն 70-80 տոկոս ձայն, իսկ ԱԺ-ում էլ ընդդիմութիւն չկայ: Որտեղի՞ց պիտի լինի հակայեղափոխութիւն: Սա մտածուած է արւում, որ շեղեն ժողովրդի ուշադրութիւնը կարեւոր խնդիրներից: Մտածուած է արւում, որ վաղուայ իրենց ձախորդութիւնները բարդեն «հակայեղափոխականների» վրայ: Չկայ հակայեղափոխութիւն:

Կը լինեն դժգոհութիւններ, բայց Դաշնակցութիւնը երբեք հակապետական չի եղել ու չի լինի: Դաշնակցութիւնը կը բռնի այն մարդու ձեռքը, որը կը փորձի մեր պետութիւնը հանել ուղեծրից եւ այլ ուղղութեամբ տանել: Փորձում են Արցախը դարձնել առեւտրի առարկայ, ցուցադրութեան առարկայ, փորձում են ապրիլեան պատերազմի նահատակների թափուած արիւնը կասկածի տակ դնել, թէ` դա դաւադրութեան հետեւանք է: Ինչպէ՞ս ենք այդ մայրերին պատասխան տալու:

Մենք կողմ ենք` յանցագործների տեղը բանտում է, դաւաճանների տեղը կախաղանն է: Բայց պէտք է արդարութիւնը բոլորի համար հաւասար լինի: Եթէ ապրիլեան պատերազմի ժամանակ եղել է դաւադրութիւն, ուրեմն արդէն անլուրջ է այդ մասին յայտարարութիւն անելը. նախ` դաւադիրները պէտք է արդէն յայտնուէին բանտում, յետոյ` նոր հրապարակուէր այդ մասին: Այդ ի՞նչ յանձնաժողով պէտք է լինի ԱԺ-ում, որ քննարկի ապրիլեան պատերազմը: Այն մարդիկ, որոնք հայկական բանակում մէկ օր շարք չեն կանգնել, չեն ծառայել, նրա՞նք պէտք է քննեն ապրիլեան դէպքերը, ովքեր բանակի մասին տարրական գիտելիքներ չունեն, մէկ անգամ վառոդի հոտ չեն շնչել:

Յարգելի’ հայրենակիցներ, մենք միակամ ենք, ուշի ուշով հետեւում ենք եւ ամէն րոպէ բարձրաձայնելու ենք իշխանութիւնների ձախորդ քայլերի, յայտարարութիւնների եւ գործողութիւնների մասին: Մեր նպատակը մեր հայրենիքի, մեր պետութեան` «Զարգանալ` չզիջելով» սկզբունքով ուղին է: Առայ’ջ, ընկերնե’ր»,- խօսքը եզրափակեց Տարօն Տօնոյեանը: