Արդուինի հայկական եկեղեցւոյ Կողքին Գիւղապետը Զուգարան Կառուցել Կու տայ

Աշխարհ, Էրկիր

Լրագրող եւ գրող Օրհան Եաւուզ Artvinden.com կայքին մէջ կ՛ահազանգէ Արդուինի հայկական եկեղեցին պղծելու մասին:

«2019-ի Մայիս 12-ին ընկեր մը ինծի զանգահարեց ու տեղեկացուց, որ Արդուինի կեդրոնական Համամլը (Դոլիսխան) գիւղին մէջ գտնուող 9-րդ դարու եկեղեցւոյ շէնքի հարեւանութեամբ հանրային զուգարանի շինարարութիւն մը կը նախապատրաստուի։

Ան խնդրեց, որ հետաքրքրուինք, թէ ճիշդ են արդեօք այդ լուրերը: Ան ուղարկեց նաեւ իր ստացած լուսանկարները, ուր կ՛երեւի, որ շինարարութեան նպատակով եկեղեցւոյ մէջ 20-30 պարկ սեմենթ, երկու հատ զուգարանակոնք բերուած է, շէնքի մուտքի դրան ձախ կողմը քանդուած սալայատակ շարուած է, ինչպէս նաեւ կոյուղիի համար երկու հատ խողովակ բերուած է», կը պատմէ Եաւուզ:

Անոր խօսքով` ինք սկիզբը չէ հաւատացած, թէ եկեղեցւոյ տարածքին մէջ զուգարան կառուցելու նախաձեռնութիւնը կը համապատասպանէ իրականութեան: Կարծած է, թէ լուրերը չափազանցուած են, իսկ եկեղեցիին մէջ եղած շինանիւթերը, ենթադրած է, թէ մէկ այլ տեղ օգտագործելու համար են: Ճշգրիտ տեղեկութիւն ստանալու նպատակով Եաւուզ զանգահարած է Արդուինի իր ընկերներուն եւ խնդրած է ստուգել այդ լուրերը` կարծելով, որ ատոնք կրնան տարբեր միջկրօնական գժտութիւն հրահրելու նպատակով կատարուած սադրանք ըլլան:

«Բայց, ցաւօք, տարածքին մէջ կատարուած ուսումնասիրութիւնները հերքեցին իմ բոլոր լաւատեսական ենթադրութիւնները: Ստացած տեղեկութեան համաձայն` Համամլը գիւղի գիւղապետը որոշած է եկեղեցւոյ հարեւանութեամբ զուգարան կառուցել, այդ նպատակով, ինչպէս կ՛երեւի լուսանկարներուն մէջ, շինութեան մուտքի ձախ կողմը յատակին աղիւսներ շարել տուած է: Գիւղապետը հրաժարած է հանդիպելէ գիւղ եկած Զբօսաշրջութեան եւ մշակոյթի նահանգային վարչութեան տնօրէնին եւ ոստիկանին հետ», – կը գրէ հեղինակը:

Նշուած եկեղեցին մշակոյթի նաախարարութեան կողմէ ճանչցուած է որպէս յատուկ պահպանութեան ենթակայ մշակութային արժէք: Եաւուզ կոչ ըրած է խստօրէն դատապարտելու շուրջ 1100-ամեայ եկեղեցւոյ տարածքին մէջ նման պիղծ եւ անարգող կառուցապատման նախաձեռնութիւնը: