Ջաւախքի Ասպինձայի Շրջանի Միակ Հայաբնակ Գիւղին ՄԷջ «Արմաթ» Ճարտարագիտական Կեդրոն Կը Բացուի

Հայաստան, Սփիւռք

Ջաւախքի Ասպինձայի շրջանի միակ հայաբնակ գիւղին` Տամալայի մէջ, Ապրիլ 20-ին տեղի պիտի ունենայ «Տամալայի օր» տօնախմբութիւնը եւ պիտի բացուի «Արմաթ» ճարտարագիտական կեդրոն, որ հնարաւորութիւն պիտի տայ դպրոցականներուն անվճար սորվիլ ճարտարագիտութիւն, եռաչափ ձեւաւորում, ծրագրաւորում, ռոպոթաշինութիւն, ինչպէս նաեւ մասնակցիլ մասնագիտական մրցոյթներու, արհեստագիտական ճամբարներու, ծանօթանալ Հայաստանի ու Ջաւախքի միւս դպրոցականներուն հետ, փոխանակուիլ գիտելիքով ու փորձով եւ նորարար գաղափարներ իրագործել:

Ինչպէս «Հայերն այսօր»-ին կը յայտնեն «Ջաւախքին աջակցութիւն» հիմնադրամէն, բացման արարողութեան ներկայ պիտի ըլլան Վրաստանի մէջ Հայաստանի դեսպան Ռուբէն Սադոյեան, «Ջաւախքին աջակցութիւն» հիմնադրամի (ՋԱՀ) պատուիրակութիւնը Սօս Սահակեանի գլխաւորութեամբ, Առաջատար արհեստագիտութիւններու ձեռնարկութիւններու միութիւնը (ԱՏՁՄ) Սեդրակ Վարդանեանի գլխաւորութեամբ, Վրաստանի եւ Հայաստանի խորհրդարաններու պատգամաւորներ, տեղական իշխանութիւններու ներկայացուցիչներ, հոգեւոր դասի ներկայացուցիչներ, բազմաթիւ գործարարներ, տարբեր երկիրներէ ժամանած հիւրեր եւ կեդրոնի սաներ:

Բացման օրը կը նախատեսուի Սուրբ Պատարագ Տամալայի Սուրբ Խաչ եկեղեցւոյ մէջ, որուն պիտի յաջորդէ «Արմաթ» ճարտարագիտական կեդրոնի բացման արարողութիւնը, այնուհետեւ` Տամալա գիւղի պարարուեստի կեդրոնի բացման հանդիսաւոր արարողութիւնը: Տեղի պիտի ունենայ համերգային ծրագիր, հիւրասիրութիւն:

«Արմաթ» ճարտարագիտական կեդրոնի հիմնման ծրագիրը Վրաստանի մէջ կ՛իրականացնէ «Ջաւախքին աջակցութիւն» հիմնադրամի Վրաստանի ներկայացուցչութեան կողմէ յառաջատար արհեստագիտութիւններու ձեռնարկութիւններու միութեան հետ համագործակցութեամբ եւ այլ անհատ բարերարներու ու կառոյցներու աջակցութեամբ: