Մոսկուայի Մէջ Տեղի Ունեցաւ Մնացականեան- Լաւրով-Մամետեարով Հանդիպումը

Աշխարհ, Հայաստան

Ապրիլ 15-ին Մոսկուայի մէջ Ռուսիոյ նախաձեռնութեամբ տեղի ունեցաւ Հայաստանի, Ատրպէյճանի եւ Ռուսիոյ արտաքին գործոց նախարարներ Զոհրապ Մնացականեանի, Էլմար Մամետեարովի եւ Սերկէյ Լաւրովի աշխատանքային հանդիպումը, որուն նաեւ մասնակցեցան ԵԱՀԿ-ի Մինսքի խմբակի համանախագահները:

Հանդիպումի աւարտին անոր մասնակիցները հրապարակած են միացեալ հաղորդագրութիւն մը, որուն մէջ նշուած է. «Ի զարգացումն Մարտ 29 -ին Վիեննայի մէջ Ատրպէյճանի նախագահ Իլհամ Ալիեւի եւ Հայաստանի վարչապետ Նիկոլ Փաշինեանի միջեւ կայացած վեհաժողովին ժամանակ ձեռք բերուած համաձայնութիւններուն` հանդիպման մասնակիցները քննարկեցին սահմանին վրայ եւ շփման գիծին մէջ կացութիւնը, ինչպէս նաեւ մարդասիրական ոլորտին մէջ փոխադարձ գործակցութեան հաստատման հեռանկարները: Տեղի ունեցաւ միտքերու հանգամանալի փոխանակում` լուծման հիմնարար հարցերուն շուրջ:

«Հայաստանի եւ Ատրպէյճանի արտաքին գործոց նախարարները վերահաստատեցին կողմերուն մտադրութիւնը` շարունակելու քաղաքական-դիւանագիտական միջոցներով ղարաբաղեան տագնապի լուծման ուղղութեամբ ջանքերը:

«Ընդգծուեցաւ շահագրգռուածութիւնը տագնապի գօտիին մէջ կացութեան հետագայ կայունացման ուղղութեամբ, մասնաւորաբար գիւղատնտեսական աշխատանքներու ժամանակաշրջանին:

«Անոնք նաեւ համաձայնեցան փոխադարձութեան հիման վրայ քայլեր ձեռնարկել` թոյլատրելու կողմերու տարածքին մէջ կալանքի մէջ գտնուող անձերու հարազատներու այցելութիւնները: Նախարարները պատրաստակամութիւն յայտնեցին գործնական քայլերու ձեռնարկել` մարդոց միջեւ հաղորդակցութիւններու հաստատման ուղղութեամբ, որուն ծիրին մէջ կ՛իյնան նաեւ զանգուածային լրատուամիջոցներու ներկայացուցիչներու փոխադարձ այցելութիւնները:

«Ռուսիոյ արտաքին գործոց նախարարը եւ ԵԱՀԿ-ի Մինսքի խմբակի համանախագահները վերահաստատեցին իրենց յանձնառութիւնը միջնորդական առաքելութեան նկատմամբ` ուղղուած շրջանին մէջ կայուն խաղաղութեան հաստատման: Հանդիպումին մասնակիցները համաձայնեցան մօտիկ ապագային շարունակել հաղորդակցութիւնները»:

Նախքան այդ, Ռուսիոյ արտաքին գործոց փոխնախարար Կրիկորի Քարասին հանդիպում ունեցաւ ԵԱՀԿ-ի Մինսքի խմբակի համանախագահներուն եւ ԵԱՀԿ-ի գործող նախագահի անձնական ներկայացուցիչին հետ:

Ռուսիոյ արտաքին գործոց նախարարութեան մամլոյ ծառայութիւնը հաղորդեց, որ խորհրդակցութիւններու ընթացքին քննարկուած են Լեռնային Ղարաբաղի տագնապի լուծման ուղղուած բանակցային հոլովոյթին հեռանկարները եւ լուծման գործին մէջ երեք երկիրներու ջանքերուն համակարգումը:

Նշենք, որ Հայաստանի արտաքին գործոց նախարարը երէկ կէսօրին հանդիպում ունեցած էր Սերկէյ Լաւրովի հետ: