Հայոց Ցեղասպանութեան Ճանաչման Պահանջով Մոմավառութիւն՝ Սպիտակ Տան Առջեւ

Աշխարհ, Սփիւռք

Սպիտակ տան առջեւ իրականացած մոմավառութիւնը յիշեցում էր Միացեալ Նահանգներու նախագահին Հայոց Ցեղասպանութեան փաստը ճանչնալու պահանջին մասին: Այս մասին կը հաղորդէ «Ամերիկայի Ձայն»-ը։

Պահանջ, որ ըստ հաւաքուածներու անհրաժեշտ է պատմական արդարութեան վերականգնման եւ ապագային նման ողբերգութեան կանխման համար: Այս անգամ մոմավառութեան մասնակիցները որոշեցին նաեւ յատուկ շնորհակալութիւն յայտնել ԱՄՆ-ի այն նահանգներուն, որոնք մէկ դար առաջ յատուկ ներդրում ունէին ցեղասպանութենէն տուժած հայ ժողովուրդին օգնելու գործին.

«Ալապամա, Քալիֆորնիա, Միսիսիփի, Նիւ Եորք եւ Վիրճինիա, մենք ընդմիշտ շնորհակալ պիտի ըլլանք այն բոլոր զոհաբերութիւններու համար, որ դուք ըրիք այս անմեղ մարդոց փրկելու համար»,- ըսաւ Նանար Կէուրկունեան:

Սնունդ, հագուստ եւ դեղորայք՝ Միացեալ Նահանգներու քաղաքացիները 1916-1930 թուականներուն Մերձաւոր Արեւելքի մէջ ամերիկեան օգնութեան կազմակերպութեան ծիրէն ներս Հայոց Ցեղասպանութենէն տուժած հայերուն շուրջ 2.6 միլիառ տոլարի համարժէք օգնութիւն տրամադրեցին՝ գումար, որ գրեթէ հաւասար է այսօրուան Հայաստանի Հանրապետութեան պետական պիւտճէին:

Միայն Ֆրեզնոն 30 թոն չամիչ տրամադրեց, Սան Ֆրանսիսքոյի մէջ հաւաքուած էր շուրջ 2000 թոն հագուստ, Քալիֆորնիոյ Լոնկ Պիչի դպրոցներու աղջիկները հաւաքած էին 3000 խտացած կաթ, Վիրճինիայէն 2000 կամաւոր արձանագրուած էր, իսկ Միսիսիփին տրամադրած էր 2000 թոն եգիպտացորեն եւ 200 թոն ալիւր: Օգնութիւն, որուն շնորհիւ փրկուեցան անթիւ մարդկային կեանքեր: Իսկ այսօր նաեւ այդ օգնութեան շնորհիւ փրկուած հայերու ժառանգները Միացեալ Նահանգներու մայրաքաղաքին մէջ Սպիտակ տան առջեւ հաւաքուած էին կրկին անգամ բարձրացնելու պատմական արդարութեան իրենց պահանջը:

«Պարոն Թրամփ, ճանչցի՛ր Ցեղասպանութիւնը բայց եւ այնպէս գիտցիր, որ եթէ դարձեալ ուրանաս, ես, իբրեւ նոր ամերիկահայ սերունդի անդամ կը վստահեցնեմ քեզ, որ իմ սերունդը այս կառավարութեան տիրանալով, պիտի փաստէ, որ հայկական պատմութիւնը արմատախլութեան պատմութիւն չէ, այլ վերածնունդի պատմութիւն»,- իր ելոյթին մէջ յայտարարեց Նարեկ Գոյումճան:

Յիշեցնենք, որ Միացեալ Նահանգներու նախագահը, Ապրիլ 24-ին, աւանդաբար հանդէս կու գայ յատուկ յայտարարութեամբ, որ նուիրուած է մէկ դար առաջ տեղի ունեցած հայերու կոտորածին, որ նախագահ Պարաք Օպամայէն սկսեալ ԱՄՆ-ի նախագահները Մեծ Եղեռն կ՝անուանեն: Միացեալ Նահանգներու 40-րդ նախագահ Ռոնալտ Ռէկընը 1981-ի իր յայտարարութեան մէջ օգտագործած էր Հայոց Ցեղասպանութիւն եզրը: