«Ճանաչիր Քո Հայրենիքը» Ծրագիրին Նպատակն է Երիտասարդները Ծանօթացնել Պատմամշակութային Կոթողներուն. Տնօրէն

Այլեւայլ, Հայաստան

«Արարիչ» բարեգործական հիմնադրամին կողմէ իրականացուող «Ճանաչիր քո հայրենիքը» ծրագիրի եօթներորդ փուլին ծիրէն ներս, այսօր, Արցախի Հանրապետութեան Մեսրոպ Մաշտոց համալսարանի 28 ուսանող՝ եռօրեայ այցով մեկնած է Մայր Հայաստան: Այս մասին կը հաղորդէ Artsakhpress.am-ը։

«Արարիչ» բարեգործական հիմնադրամի տնօրէն Նարեկ Աւետիսեան ըսած է, որ Արցախի տարբեր համալսարաններէ եւ այլ ուսումնական հաստատութիւններէ՝ աւելի քան 210 երիտասարդ՝ արդէն մասնակցած է ծրագիրին: «Ճանաչիր քո հայրենիքը» ծրագիրը կը կրէ շարունակական բնոյթ:

Տնօրէնին խօսքով՝ ծրագիրը նպատակ ունի մասնակիցները ծանօթացնել մշակութային կոթողներուն, նպաստել անոնց հայրենաճանաչութեան զարգացման, հարստացնել գիտելիքները, հայրենիքի նկատմամբ վերստին սերմանել նուիրուածութիւն եւ սէր:

Ն. Աւետիսեանի կարծիքով՝ ծրագիրը նաեւ պիտի նպաստէ երիտասարդութեան ռազմահայրենասիրական դաստիարակութեան եւ երիտասարդներու համախմբման: