Հայաստանի Տնտեսութեան Զարգացման Հեռանկարը Արտահանումն է. Նիկոլ Փաշինեան Խորհրդարանին կը Ներկայացնէ Կառավարութեան Ծրագիրը

Հայաստան

Հայաստանի Հանրապետութեան վարչապետ նիկոլ Փաշինեան երկրի տնտեսութեան զարգացման հեռանկար կը համարէ արտահանումը: Ըստ Armenpress.am-ի՝ այս մասին ՀՀ վարչապետը ըսաւ Ազգային ժողովին՝ ներկայացնելով ՀՀ կառավարութեան գործունէութեան ծրագիրը: «Մենք այստեղ ունինք, ըստ էութեան, անսահմանափակ հնարաւորութիւններ, քանի որ Հայաստանը կը հանդիսանայ Եւրասիական տնտեսական միութեան անդամ, միւս կողմէն Եւրասիական տնտեսական միութիւնը ազատ առեւտուրի համաձայնագրեր ունի շարք մը երկիրներու, ինչպէս օրինակ՝ Իրանի եւ Վիեթնամի հետ: Այս կարգի պայմանագրերու աշխարհագրութիւնը յառաջիկային պիտի ընդլայնուի: Հայաստանը կ՝օգտուի Արեւմտեան շարք մը երկիրներու հետ արտօնեալ GSP եւ GSP+ համակարգերէն: Այնպէս որ արտահանման չօգտագործուած ներուժը հսկայական է»,- ըսաւ ՀՀ վարչապետը:

Ըստ Փաշինեանի՝ արտահանման ոլորտէն ներս հիմնական խնդիրը մեր ապրանքներուն համապատասխանեցումն է միջազգային ամենաբարձր որակի չափանիշներուն, համապատասխան ծաւալներու առկայութիւնը եւ շուկայականութեան խնդիրները: «Մեր կառավարութիւնը ամէն ինչ պիտի ընէ այս հարցերուն մէջ գործարարութեան աջակցութիւն ցուցաբերելու եւ անոնց համար շուկաներու իրական հասանալիութիւն ապահովելու համար: Արտահանման ոլորտէն ներս մեր մեծագոյն խնդիրը հանքանիւթ արտահանող երկրէն պատրաստ արտադրանք արտահանող երկիր դառնալն է: Այդ կառուցուածքին մէջ բարձր արհեստագիտական ապրանքներու արտահանման տեսակարար կշիռը լրջագոյնս մեծցնելը մեր առանցքային ձգտումն է: Նման խնդիր լուծելու համար էական է հայաստանեան ապրանքներու եւ ծառայութիւններու մրցունակութիւնը»,- ընդգծեց ՀՀ վարչապետը:

Անոր խօսքով՝ ատիկա պիտի ըլլայ կառավարութեան գործունէութեան յաջորդ կարեւոր ուղղութիւնը, երբ հարկային հաւասարակշռուած համակարգի, աշխատանքի արտադրողականութեան շարունակական բարձրացման միջոցով էականօրէն պիտի աճի տնտեսութեան մրցունակութիւնը: