Շոշ Համայնքի Մանկապարտէզը Շահագործման Պիտի Յանձնուի Մայիսին

Այլեւայլ, Հայաստան, Սփիւռք

«Հայաստան» համահայկական հիմնադրամի եւ Արցախի Հանրապետութեան պետական պիւտճէի համատեղ ջանքերով՝ Ասկերանի շրջանի Շոշ համայնքին մէջ կը կառուցուի մանկապարտէզ մը, որուն շինարարական աշխատանքները նախատեսուած են աւարտին հասցնել Մայիսին:

Ըստ Artsakhpress.am-ի՝ Շոշ համայնքի ղեկավար Էրիկ Աբրահամեան ըսած է, որ մանկապարտէզի կառուցման աշխատանքները սկսած են 2018-ին:

Ըստ գիւղապետին՝ մանկապարտէզի շէնքը մէկ յարկանի է՝ նախատեսուած 50 փոքրիկի համար: «Ներկայիս մանկապարտէզի շինարարական աշխատանքները գրեթէ աւարտած են. Կ՝ընթանան շէնքի ներքին յարդարման աշխատանքներ: Մանկապարտէզի բակին մէջ կը կառուցուի խաղահրապարակ:

Պիտի իրականացնենք նաեւ արտաքին յարդարման եւ տարածքի բարեկարգման աշխատանքներ»,- ըսած է Է. Աբրահամեան:

Ան նաեւ նշած է, որ մանկապարտէզը նաեւ պիտի ունենայ անհրաժեշտ գոյք, որ  պիտի ապահովէ «Հայաստան» համահայկական հիմնադրամը: