Թուրքիոյ Մէջ Հայերէն Մնացած Գանձերը Հանգիստ Չեն Տար Նոյնիսկ Օրինապահներուն. Տիարպեքիրի Մէջ 4 Ոստիկան Ձերբակալուած է

Աշխարհ, Էրկիր

Տիարպեքիրի մէջ, անօրինական կերպով պեղումներ կատարելու մեղադրանքով, ձերբակալուած է 8 մարդ, որոնց 4-ը՝ ոստիկան: Պարզուած է, որ ոստիկանները բերած են զրահապատ մեքենայ, որպէսզի ցոյց տան, թէ պեղումները իբր թէ օրինական են: Այս մասին, ըստ Akunq.net-ի, կը հաղորդեն «Հիւրիեթ» եւ «Ակօս» պարբերականները:

Անցեալ շաբաթ Տիարպեքիրի անվտանգութեան տնօրինութեան մաքսանենգութեան եւ կազմակերպուած յանցագործութիւններու բաժանմունքը ստացած է ծանուցում, թէ կը կատարուին անօրինական պեղումներ: Հետաքննութեան իբրեւ արդիւնք ձերբակալուած են Սիլվանի նահանգային անվտանգութեան տնօրէն Օմեր Օզթիւրքը, քննիչի օգնականներ Պեքիր Պ.-ն եւ Սերքան Ճ.ն, ինչպէս նաեւ ոստիկաններ Ալի Փ.-ն ու Ապտիւլմիւտալիփ Կ.-ն: Սոյն ոստիկաններուն հետ եղած է եւս 4 հոգի:

8 հոգինոց խումբը հազիւ փորած էր 1 մ խորութեամբ փոս, երբ անոնց հետեւած ոստիկանները՝ յանցանքի վայրին մէջ՝ ձերբակալած են զանոնք: Կասկածեալները Տիարպեքիրի անվտանգութեան տնօրինութեան մաքսանենգութեան եւ կազմակերպուած յանցագործութիւններու բաժանմունքին մէջ հարցաքննուելէ ետք՝ ուղարկուած են արդարադատութեան վարչութիւն: Կասկածեալները տուած են կեղծ ցուցմունք, թէ իբր որոնած են ՔԲԿ-ի անդամներուն թաղած ոսկիներն ու դրամները: Սակայն հետաքննութիւնը պարզած է, որ իրականութեան մէջ անոնց նպատակը եղած է գտնել հայերէն մնացած գանձերը:

8 հոգինոց խումբի բոլոր անդամները կալանաւորուած են ու բանտարկուած: Պարզուած է, որ գանձ գտնելու գործին մէջ ընդգրկուած եղած է նաեւ յանցագործներէն մէկուն մայրը, որ, որդիին հեռախօսով խորհուրդներ տալով, փորձած է ուղղորդել զինք: