Յիմարներու Համաձայնութիւն. Հայ Դատի Սուր Արձագանգը` Արցախի Հարցով Ձեռք Բերուած «Համաձայնութեան» Վերաբերեալ

Հայաստան, Սփիւռք

ԵԱՀԿ Մինսկի խումբի համանախագահներ Իկոր Պոպովը (ՌԴ), Ստեֆան Վիսգոնդին (Ֆրանսա) եւ Էնտրիւ Շոֆըր (ԱՄՆ), Յունուար 16-ին, Փարիզի մէջ, ՀՀ արտաքին գործոց նախարարի ժամանակաւոր պաշտօնակատար Զոհրապ Մնացականեանի ու Ատրպէյճանի արտաքին գործոց նախարար Էլմար Մամետեարովի միջեւ տեղի ունեցած հանդիպումէն ետք, հանդէս եկած էին յայտարարութեամբ:

 

Յայտարարութեան մէջ մասնաւորապէս նշուած էր. «Հայաստանի եւ Ատրպէյճանի արտաքին քաղաքական գերատեսչութիւններու ղեկավարները քննարկած են Լեռնային Ղարաբաղի հակամարտութեան կարգաւորման հետ կապուած բազմաթիւ հարցեր ու համաձայնութեան եկած այն հարցով, որ հարկաւոր է յստակ քայլեր ձեռնարկել երկու ժողովուրդները խաղաղութեան նախապատրաստելու համար»:

 

Հայ Դատի գրասենեակը չէ յապաղած արձագանգելու յայտարարութեան:

 

ԱՄՆ Հայ Դատի գրասենեակի գործադիր տնօրէն Արամ Համբարեան, դիմատետրի իր էջին վրայ գրած է.

 

«Հայաստանի եւ Ատրպէյճանի ԱԳ նախարարները «համաձայնած են այն հարցով, որ հարկաւոր է յստակ քայլեր ձեռնարկել երկու ժողովուրդները խաղաղութեան նախապատրաստելու համար»:

 

Իւրաքանչիւրն ալ «խաղաղութիւն» կ՝ուզէ, ատիկա յստակ է, սակայն «սատանան» մանրամասներու մէջ է, որոնք արժէ ուսումնասիրել ՀԻՄԱ, քանի դեռ Արցախի կորուստին դանդաղօրէն յանգեցուցած լաւ մտադրութիւններու եւ քաղաքավար դիւանագիտութեան պատճառով դառն ափսոսանքով ետ չենք նայած:

 

Սեղանին դրուած համաձայնութիւնը յայտնի է իբրեւ «Մատրիտեան սկզբունքներ»: Անոնք Արցախին կոչ կ՝ընեն նախնական, ռազմավարական, տարածքային եւ անդառնալի զիջումներու դիմելու Ատրպէյճանի յետաձգուած, անորոշ եւ շրջելի խոստումներուն դիմաց, այսինքն` հող` փաստաթուղթի դիմաց:

Յանուն «խաղաղութեան»` այս գործարքին աջակցիլը հայերէն պիտի պահանջէ հրաժարիլ ո՛չ միայն գիտակցութենէ, այլեւ ինքնապահպանական բնազդէ՝

1) հաւատալով, թէ Արցախի այս հսկայական տարածքներու յանձնումը որեւէ կերպով Արցախը պիտի դարձնէ աւելի ապահով կամ Ատրպէյճանը` աւելի քիչ յարձակող,

2) հաւատալով, թէ Արցախի կողմէ տարածքներու յանձնման պիտի յաջորդէ այն քայլը, որ Ատրպէյճանը պիտի հրաժարի Արցախի ինքնիշխանութեան դէմ իր նկրտումներէն,

3) հաւատալով, որ եթէ Ատրպէյճանը վերականգնէ Արցախի «ինքնավարութիւնը» (սովետական շրջանի ոճով), ատիկա պիտի յանգեցնէ խաղաղ եւ կայուն համակեցութեան,

4) հաւատալով, թէ Արցախի շուրջ տեղակայուած միջազգային խաղաղապահները իսկապէս պիտի վտանգեն իրենց կեանքը` արգելափակելու համար ատրպէյճանական նոր յարձակումները,

5) հաւատալով, որ արդարացի պիտի ըլլայ հարուած հասցնել Արցախի ռազմավարական զիջումներուն, այն պարագային, երբ Ատրպէյճանը կը յետաձգէ իր անորոշ (կամ յաճախ փոփոխուող) խոստումներուն իրականացումը,

6) հաւատալով, թէ Արցախը պէտք է միջազգային համաձայնագիրի առարկայ ըլլայ` առանց անոր լիիրաւ մասնակցութեան:

 

#Յիմարներու համաձայնութիւն»