Օփերայի Շէնքին Յարակից Սրճարանները Պիտի Դառնան Կանաչ Տարածք

Հայաստան

Օփերայի յարակից տարածքին մէջ պիտի վերականգնուի կանաչ գօտին․ ֆէյսպուքի իր էջին մէջ գրած է Երեւանի քաղաքապետի խօսնակ Յակոբ Կարապետեան:

«Քաղաքապետ Հայկ Մարութեանի եւ անոր թիմի հանրային յանձնառութեան համաձայն, քաղաքապետարանը սկսած է Երեւանի մէջ կանաչ տարածքներու վերականգնման եւ զարգացման գործընթացը», գրած է ան:

Ըստ անոր, մասնաւորապէս, Օփերայի շրջակայքը` անմիջապէս Ազատութեան հրապարակին յարող հատուածին մէջ, քաղաքի սեփականութիւնը հանդիսացող հողամասերը վարձակալած եւ սրճարան բացած անձիք քաղաքապետարանի համապատասխան ստորաբաժանումէն ստացած են ծանուցում, որմով կ՛առաջարկուի հրաժարիլ վարձակալութեան իրաւունքով տրամադրուած հողամասերու մէկ մասէն (լուսանկարներուն մէջ նշուած է կանաչով):

Վարձակալներու հետ կնքուած պայմանագիրներուն համաձայն, Երեւան համայնքը, ի դէմս քաղաքապետարանի, իրաւունք ունի Որեւէ ատեն` 30 օր առաջ ծանուցելու պայմանով, ներկայացնել վարձակալութեամբ տրուած տարածքը ազատելու պահանջ:

«Նշեմ, որ կանաչապատման ենթակայ տարածքին մէջ գործող բոլոր սրճարանները, բացառութեամբ մէկուն, սրճարանային տարածք ունին յարակից հատուածներու մէջ, այսինքն, պիտի կանաչապատուի անոնց տնօրինած տարածքներուն միայն մէկ մասը: Քաղաքապետարանը, պայմանագիրի սոյն դրոյթը իրացնելու պարագային տնտեսվարողին փոխհատուցում տրամադրելու պարտաւորութիւն չունի: Այնուհանդերձ, քաղաքի իշխանութիւնները հաւատարիմ են ձեռնարկատիրութիւնը խթանելու իրենց քաղաքականութեան, եւ նշուած տնտեսվարողները, բնականաբար, կրնան շարունակել իրենց գործը քաղաքի այլ, աւելի պատշաճ հատուածներու մէջ:

«Նշածս տարածքները ազատելէ եւ զանոնք կրաձոյլ ծածկոյթներէ մաքրելէ ետք քաղաքապետարանը պիտի կանաչապատէ տարածքը արդէն այս գարնան սկիզբը»,- կը հաղորդէ քաղաքապետին խօսնակը: