Մարզական Տարուան 5 Ամենատպաւորիչ Յաղթանակները

Այլեւայլ, Հայաստան

2018-ը տարին հայ մարզիկներուն տուաւ նոր փորձառութիւն մը, բայց նաեւ ստիպեց յարգանքով ընդունելու պարտութիւնը, խօսելու յաղթողի լեզուով եւ լռելու պարտութեան լռութեամբ:

Armenpress.am-ը կը ներկայացնէ տարուան 5 ամենատպաւորիչ յաղթանակները.

Անցնող տարուան լաւագոյններէն լաւագոյնը, անշուշտ, ծանրորդ Սիմոն Մարտիրոսեանն էր, որ 2018-ին 109 քկ քաշային կարգի ամենաուժեղ մարդն էր աշխարհի մէջ: Թուրքմենիստանի մէջ կայացած աշխարհի առաջնութեան՝ 109 քկ քաշային կարգի մէջ՝ Մարտիրոսեանը պոկում վարժութեան մէջ գլխավերեւը պահեց 195 քկ: Հրումի մէջ Մարտիրոսեանը բարձրացուց 240 քկ: Հայ ծանրորդը միաժամանակ սահմանեց աշխարհի 3 ցուցանիշ: Երկամարտի 435 քկ արդիւնքով Սիմոն Մարտիրոսեան 21 տարեկանին դարձաւ աշխարհի ախոյեան:

Տարուան ամենաանսպասելի յաջողութիւնը արձանագրեց ջրացատկի Վլատիմիր Յարութիւնեան-Լեւ Սարգսեան զոյգը: Անկախ Հայաստանի պատմութեան մէջ՝ առաջին անգամ՝ Հայաստանը մետալ նուաճեց Եւրոպայի առաջնութեան ընթացքին: Կլազկոյի մէջ կայացած ջրացատկի Եւրոպայի առաջնութեան Յարութիւնեան-Սարգսեան զոյգը՝ սինքրոն ցատկերուն մէջ գրաւեց 3-րդ տեղը` նուաճելով Հայաստանի պատմութեան մէջ առաջին պրոնզէ մետալը այս մարզաձեւին մէջ:

Անցնող տարուան նշանակալից մետալներէն մէկը ճիւտօ մարզաձեւէն էր, ուր Հայաստանը՝ 13 տարի անց՝ կրկին ունեցաւ Եւրոպայի ախոյեան: Իսրայէլի մէջ կայացած Եւրոպայի առաջնութեան՝ Ֆերտինանտ Կարապետեանը 4 անընդմէջ յաղթանակէ ետք՝ յաղթեց նաեւ եզրափակիչին` գերազանցելով ատրպէյճանցի Հիտայաթ Հէյտարովին:

Հայկական մարզախաղի ոչ յենակէտային մարզաձեւի մէջ, ինչպէս հեծանուային մարզաձեւը, մետալները ունին առաւել մեծ արժէք եւ նշանակութիւն: Հայաստանի հաւաքականի անդամ Էդգար Ստեփանեանը՝ Եւրոպայի մինչեւ 23 տարեկաններու առաջնութեան՝ առաջինը հասաւ եզրագիծ` դառնալով ախոյեան:

Եւ երիտասարդներու մէջ իրենց մասին խօսիլ տուին պատանեկան Ողիմպիական խաղերու Հայաստանի ներկայացուցիչները: Պուէնոս Այրէսի 3-րդ ամառնային Ողիմպիական խաղերուն՝ ծանրամարտի 77 քկ քաշի մէջ, Կարեն Մարգարեանը պոկում վարժութեան մէջ գլխավերեւը պահեց 141 քկ, այնուհետեւ հրեց 168 քկ եւ երկամարտի 309 քկ արդիւնքով դարձաւ պատանեկան Ողիմպիական խաղերու ոսկիէ մետալակիր: Արծաթէ մետալակիր դարձաւ յունահռոմէական ոճի ըմբիշ Սահակ Յովհաննիսեանը: