Ամանորեայ Փոքրիկ Հրաշքը՝ Բաղրամեան 26-ի Մէջ. Աննա Յակոբեան Հիւրընկալեց Փոքրիկները

Այլեւայլ, Հայաստան

Բաղրամեան 26-ը լի էր բազմաթիւ փոքրիկներու երգ ու ծիծաղով, զանազան խաղերով ու ներկայացումներով: ՀՀ վարչապետի պաշտօնակատարի տիկին Աննա Յակոբեան, Դեկտեմբեր 27-ին, հիւրընկալած էր 7-13 տարեկան 300 մանուկ։

Ըստ Armenpress.am-ի՝ ամանորեայ հանդիսութեան կը մասնակցէին Արցախեան հերոսամարտին զոհուած ազատամարտիկներու զաւակներ, պատերազմին անյայտ կորածներու թոռնիկներ, Ապրիլեան մարտական գործողութիւններուն զոհուած զինծառայողներու զաւակներ, մանկատուներու սաներ, սուրիահայ, սահմանամերձ գիւղերու եւ քաղցկեղ, շաքարախտ ունեցող բազմաթիւ փոքրիկներ:

Բաղրամեան 26-ի մէջ փոքրիկները դիմաւորեց ՀՀ վարչապետի պաշտօնակատարի տիկին Աննա Յակոբեան՝ իր երկու դուստրերուն հետ: «Հաւաքուած ենք միասին՝ գիւղէն, քաղաքէն, տարբեր վայրերէ, որպէսզի միասին անցնենք այս օրը, միասին ցտեսութիւն ըսենք 2018-ին եւ դիմաւորենք 2019-ը: Մենք այստեղ ենք, որպէսզի ուշադիր ըլլանք իրարու հանդէպ, որպէսզի ընկերանանք իրարու հետ, սիրենք իրար եւ յաջորդ ողջ տարուան ընթացքին կապ պահենք իրարու հետ: Մենք չենք եկած այսօր պարզապէս ժամանակ անցնենք ու երթանք, եկած ենք իրարու հետ ծանօթանալու, ընկերանալու եւ ամբողջ տարին իրարու հետ կապի մէջ ըլլալու համար»,- նշած է Աննա Յակոբեան:

Ան վստահութիւն յայտնած է, որ անցնող տարին փոքրիկները եղած են խելացի, լաւ սորված են իրենց դասերը եւ մէկ տարի մեծցած են՝ լաւ մարդ դառնալու իրենց ճանապարհին: Աննա Յակոբեան փոքրիկները յորդորեց յաջորդ տարի ատիկա աւելի մեծ ջանքով ընելու:

Փոքրիկներուն համար կազմակերպուած էին տարբեր խաղեր, աճպարարական հնարքներու ցուցադրութիւն, այլ ծրագիրներ:  Անոնց այցելած Կաղանդ պապան ու Ձիւնանուշը բոլորին նուիրեցին հայկական արտադրութեան ժամացոյցներ եւ քաղցրաւենիքով լի տոպրակներ: Ի դէպ, արտադրողները բոլոր նուէրները տրամադրած էին անվճար: Փոքրիկներուն համար պատրաստուած էր նաեւ մանկական հիւրասիրութիւն:

Աննա Յակոբեան շրջած է դահլիճին մէջ, անձամբ շփուած բոլոր փոքրիկներուն հետ: Անոր հետ նկարուիլ ուզած են բոլոր փոքրիկները: Անոնցմէ շատեր ծանօթացած ու շփուած են նաեւ վարչապետի պաշտօնակատարի աղջկան՝ Շուշան Փաշինեանի հետ: