Հայրենադարձ Կարէն Պապեան Կը Նախատեսէ Իր Գործը Հիմնել Տեղեկատուական Արհեստագիտութեան Ոլորտին Մէջ

Հայաստան, Սփիւռք

Ռուսիա 25 տարի ապրելէ ետք Պապեաններու ընտանիքը որոշած է տեղափոխուիլ Հայաստան: Ինչպէս տարբեր երկիրներու մէջ գտնուող հայ բազմաթիւ ընտանիքներու մէջ ժամանակ առ ժամանակ կը քննարկուի Հայրենիք վերադառնալու հարցը, այնպէս ալ Պապեանները յաճախ կը մտածէին հայրենիք տեղափոխուելու մասին: Ընտանիքին հայրը` Կարէն Պապեանը «Արմենփրես»-ի հետ զրոյցի ընթացքին նշած է, որ Հայաստան տեղափոխուելու որոշումին մէջ վճռական եղաւ երեխաներու ցանկութիւնը:

«Հայաստանէն Ռուսիա տեղափոխուած ենք 1993 թուականի Սեպտեմբեր 21-ին: Արդէն 25 տարիէ կ՛ապրինք Փերմի մէջ: Ունինք 5 երեխայ: Անոնք ծնած, մեծցած են Ռուսիոյ մէջ: Այս տարիներու ընթացքին պարբերաբար հնարաւորութիւն ստեղծած եմ, որ երեխաներս գան Հայաստան, հայրենիքի հետ կապը միշտ պահեն, սակայն Հայաստան տեղափոխուելու մասին դեռ խօսք չկար: Թէեւ վերջերս ժամանակ առ ժամանակ կը քննարկէինք այդ հարցը, սակայն մտավախութիւն ունէինք երեխաներու հետ կապուած, կը մտածէինք գուցէ անոնք չկարենան յարմարուիլ: Ժամանակը ցոյց տուաւ, որ անոնց ցանկութեամբ մենք վերջնական տեղափոխուեցանք»,-ըսած է Կարէն Պապեան:

Երեխաները նախորդ տարի ՀՀ սփիւռքի նախարարութեան «Արի տուն» ծրագիրով Հայաստան եկած են: Շատ տպաւորուած վերադարձած են Փերմ, եւ այդ ժամանակուընէ ընտանիքին մէջ սկսան լրջօրէն քայլեր ձեռնարկել Հայաստան տեղափոխուելու ուղղութեամբ:

«Ապրելով Ռուսիոյ մէջ` ես միշտ երազած եմ, որ երեխաներս ամուր կապի մէջ ըլլան հայրենիքի հետ, բայց տես, որ այսօր աւելին եղաւ. Հայաստանը, հայկական իրականութիւնը, հայրենի հողը դարձան երեխաներուս առօրեան: Մենք այստեղ ենք Օգոստոսէն, երեխաներս դպրոց կը յաճախեն: Շատ-շատ գոհ են, որ Հայաստան են, մենք ալ կ՛ոգեշնչուինք այդ ամէնով»,-աւելցուցած է ան:

Փերմի մէջ ապրելու տարիներուն Կարէնը եղած է եւ ներկայիս ալ հայ համայնքի գործունեայ անդամներէն է: Ան Փերմի հայ առաքելական եկեղեցւոյ ատենապետն է: Կարէնը կ՛ըսէ, որ այնտեղ դեռ ընելիքներ ունի, հետեւաբար որոշ ժամանակ մը Փերմ այցելութիւններ պիտի ունենայ:

«Ռուիոյ մէջ ապրած ենք 25 տարի, սակայն այսօր որոշեցինք վերաբնակիլ Հայաստան: Ես ատիկա պատահական չեմ համարեր: Գիտէք, երբ ամբողջ կանքիդ մէջ կապուած ես Հայրենիքի հետ, ան քու մէջդ է, քու սրտիդ մէջ, կը սիրես քու երկիրդ, ուրեմն սպասելի է նաեւ մեր ըրած նման քայլը»,-աւելցուցած է ան:

Քանի որ Կարէնը, մինչեւ Հայաստան տեղափոխուիլը, յաճախ այցելած է Երեւան, հետեւաբար լաւ ուսումնասիրած է գործունէութիւն ծաւալելու տեղի հնարաւորութիւնները եւ, ինչպէս ինք կ՛ըսէ, շատ յստակ գիտէ, թէ ինչով պիտի զբաղի: Իր սեփական գործը կը ցանկայ հիմնել տեղեկատուական արհեստագիտութեան ոլորտին մէջ: Այժմ իր աշխատակազմը կը հաւաքէ։

Աննա Գզիրեան