Խաղաղ Քայլերթ եւ Մոմավառութիւն Թիֆլիսի Սբ. Նշան Եկեղեցւոյ Մօտ

Սփիւռք

Նոյեմբերի 3-ին, Վիրահայոց թեմի նախաձեռնութեամբ, հաւատացեալներու խումբ մը Տէր Կիրակոս քահանայ Սիմոնեանի եւ սարկաւագներու առաջնորդութեամբ քայլերթ կատարեց դէպի Թիֆլիսի խոնարհուած Սուրբ Նշան (Սուրբ Նիկողայոս)  եկեղեցի, որ հիմնադրուած է 1624 թուականին։ Այս մասին կը տեղեկացնէ Վիրահայոց թեմը:

Փակ եկեղեցւոյ մօտ ներկաներուն դիմեցին հոգեւոր հայրը  եւ թեմի մամլոյ խօսնակը: Վերջիններս  ներկայացուցին մշակութային յուշարձանի կարգավիճակ ունեցող  եկեղեցւոյ ներկայ իրավիճակը եւ վթարային  եկեղեցւոյ մօտ ու յարակից տարածքին մէջ տարբեր աշխատանքներու իրականացման  անթոյլատրելիութիւնը:
Մոմեր վառելէ, աղօթելէ եւ շարականներ երգելէ ետք խաղաղ երթի մասնակիցները աւարտեցին խաղաղ գործողութիւնը, ափսոսանք յայտնելով  հայոց պատմական եկեղեցւոյ ներկայ անմխիթար վիճակին համար:

17-րդ դարու կառոյց Թիֆլիսի Սբ. Նշան (Սբ. Նիկողայոս) եկեղեցին ունեցած է ամբողջական ճարտարապետական տեսք: Եկեղեցիին կից /արդէն 19-րդ դարու առաջին կէսէն բացուած են արական եւ իգական, ինչպէս նաեւ տիրացուական դպրոցներ:

Խորհրդային շրջանին, Թիֆլիսի շարք մը եկեղեցիներու հետ մէկտեղ կնիք դրոած ու փակուած է նաեւ Սբ. Նշան եկեղեցին: 1930-ին եկեղեցին նորէն վերադարձուած է համայնքին, սակայն 1931-ի Մայիս 3-ին կրկին փակուած: Եկեղեցւոյ շէնքը յարմարեցուած ու ծառայած է տարբեր նպատակներու:

Սբ. Նշան եկեղեցին մեծ վնաս կրած է նաեւ քանի մը անգամ տեղի ունեցած հրդեհներու պատճառով: Մինչեւ 2002-ի հրդեհը, եկեղեցին տարբեր նպատակներով շահագործուելու պատճառով միշտ փակ եղած է: Հրդեհէն ետք անհամեմատ մեծցած է եկեղեցւոյ վթարային գործօնը: Ջուրի /քայքայիչ ազդեցութենէն նստուածքներ յառաջացած են աղօթասրահի կեդրոնական հատուածին եւ հիւսիսային նախամուտքի մակերեսին վրայ: Գրեթէ ամբողջութեամբ ոչնչացած են նաեւ եկեղեցւոյ որմնանկարները:

Սբ Նշան եկեղեցին ունեցած է նաեւ գերեզմանոց: 1970-ականներուն հիւսիսային կողմը գտնուող տապանաքարերու մեծ մասը ասֆալտապատուած է: Տեսանելի մնացած են միայն սակաւաթիւ այն տապանաքարերը, որոնց հնարաւոր չէ եղած ասֆալտապատել փոքր-ինչ բարձր ըլլալու պատճառով:

Վրաց Ուղղափառ եկեղեցին միշտ հաւակնութիւն ունենալով եկեղեցւոյ նկատմամբ՝ առ այժմ չի վերադարձուիր վիրահայ համայնքին: Եկեղեցին այսօր կանգուն է, սակայն վթարային եւ անմխիթար վիճակի մէջ է: