Ֆրանսախօս Երկիրներու Ձեռնարկներու Հիւրերը Հնարաւորութիւն Ունին Իրենց Այցելութիւններով Բացայայտելու Հայաստանը

Այլեւայլ, Աշխարհ, Հայաստան

Երեւանի մէջ Ֆրանսախօս երկիրներու գագաթնաժողովը իրականացնելը մեծ հնարաւորութիւն կու տայ Հայաստանը աւելի ճանաչելի դարձնելու աշխարհի շատ երկիրներու մէջ, յատկապէս ֆրանսախօս երկիրներու: Ըստ Armenpress.am-ի՝ այս մասին նշած է ՀՀ տնտեսական զարգացման եւ ներդրումներու նախարարութեան Զբօսաշրջութեան կոմիտէի նախագահ Հռիփսիմէ Գրիգորեան:

«Նախ կը ներկայանանք իբրեւ երկիր, որ կրնայ բարձր մակարդակով կազմակերպել միջազգային խոշոր ձեռնարկներ: Բացի այդ, հնարաւորութիւն ունինք Ֆրանսախօս երկիրներու ձեռնարկներուն ծիրէն ներս քանի մը հազարի հասնող հիւրերուն ներկայացնել մեր պետութեան զբօսաշրջային հնարաւորութիւնները: Անոնք ոչ միայն կը ներգրաւուին Ֆրանսախօս երկիրներու հիմնական ծրագիրներուն մէջ, այլեւ կրնան մասնակցիլ յարակից բազմաթիւ ձեռնարկներուն, որոնց մէկ մասը կապ ունի մեր երկրի զբօսաշրջային հնարաւորութիւններուն հետ»,- ըսած է Հռիփսիմէ Գրիգորեան:

Հայաստան եկած 3 հազարէն աւելի հիւրեր հնարաւորութիւն ունին Հայաստանը բացայայտելու ամէն օր իրականացուող անվճար շրջապտոյտներով: Հռիփսիմէ Գրիգորեան նշած է, որ օրուան ընթացքին անվճար 3 շրջապտոյտ կ՝իրականացուի տարբեր ուղղութիւններով՝ Գառնի, Գեղարդ, Նորավանք, Դիլիջան եւ այլն:

«Եթէ հիւրերը գտնեն ժամանակ, ուստի կրնան այս օրերուն մէկէն աւելի շրջապտոյտներ վերցնել: Իսկապէս ասիկա շատ լաւ հնարաւորութիւն է Հայաստանի տեսարժան, հետաքրքրական վայրերու մէջ ըլլալու համար: Ըսեմ, որ արդէն դրական արձագանգներ կը ստանանք, սակայն այդ ամէնը պիտի ամբողջացնենք Ֆրանսախօս երկիրներու ձեռնարկներուն աւարտէն ետք»,- ըսած է Հռիփսիմէ Գրիգորեան:

Կոմիտէի նախագահը նշած է, որ Ֆրանսախօս երկիրներու աւանը նոյնպէս լաւ հնարաւորութիւն կը ներկայացնէ ոչ միայն Հայաստանը իր մարզերով, այլեւ՝ Արցախը: Այն հիւրերը որոնք պիտի մնան միայն Երեւան՝ կրնան Ֆրանսախօս երկիրներու աւան այցելելով, Հայաստանի տաղաւարին մէջ ըլլալով, խտացուած ձեւով ծանօթանալ երկրի զբօսաշրջային հնարաւորութիւններուն: Այս օրերուն Հայաստանի տաղաւարը այցելուներու պակաս չ՝զգար, յատկապէս շատ են արտասահմանցի այցելուները: Զբօսաշրջային հնարաւորութիւններէն բացի, անոնց կը ներկայացուին ձեռքի աշխատանքներ, արուեստի նմուշներ, քաղցրեղէն, խոհանոցը եւ այլն:

Հռիփսիմէ Գրիգորեան կարեւոր համարած է ֆրանսախօս երկիրներու ձեռնարկները առ ցանց հարթակով լայնօրէն ներկայացնելը: Ոչ միայն նիւթերու, յօդուածներու, լուսանկարներու, տեսանիւթերու տեսքով կը ներկայացուին ֆրանսախօս երկիրներու ձեռնարկները, այլեւ նշանակալի պիտի ըլլան տեսահոլովակները, որոնք պիտի սփռուին աշխարհով մէկ տարբեր խողովակներով: Ան ընդգծած է, որ այժմ այդ ուղղութեամբ կը տարուի աշխոյժ աշխատանք: Շուտով պիտի ներկայացուի երկու հոլովակ, որոնցմէ մէկը նուիրուած պիտի ըլլայ Հայաստանի մէջ իրականացուող Ֆրանսախօս երկիրներու ձեռնարկներուն։