Մենք Բոլորս Պէտք է Ամէն Վայրկեան Մտածենք Մեր Քաղաքին Մասին. Հայկ Մարութեան Ստանձնեց Երեւանի Քաղաքապետի Պաշտօնը

Հայաստան

Երեւանի աւագանիի առաջին նիստին ընթացքին՝ «Իմ քայլը» դաշինքի ընտրական ցուցակի առաջին թիւով՝ Հայկ Մարութեան օրէնքի ուժով ստանձնեց Երեւանի քաղաքապետի պաշտօնը: Ըստ Armenpress.am-ի՝ Երեւանի նորընտիր աւագանիի առաջին նիստին ընթացքին՝ այս մասին յայտարարած է առաջին նիստը վարող Լիլիթ Պիպոյեան: «Հիմք ընդունելով, որ Երեւանի աւագանիի ընտրութիւններուն արդիւնքներով «Իմ քայլը» դաշինքը ստացած է աւագանիի անդամներու տեղերու 50 տոկոսէն աւելին, ուստի Երեւան քաղաքի մէջ տեղական ինքնակառավարման մասին» օրէնքի 44-րդ յօդուածի երկրորդ մասին համաձայն՝ «Իմ քայլը» դաշինքի ցուցակի առաջին հորիզոնականին վրայ գտնուող Հայկ Մարութեան օրէնքի ուժով կը համարուի Երեւանի ընտրուած քաղաքապետ»,- յայտարարած է ան:

Երեւանի քաղաքապետ Հայկ Մարութեան շնորհաւորած է ներկաները Երեւանի աւագանիի առաջին նիստին առիթով: Ան ընդգծած է, որ շատ յուզիչ պահ է, իսկ ինքը երջանիկ է, որ աւագանիի անդամները կը ներկայացնեն Երեւանի բնակիչները, որ տեղի ունեցած է ազատ, արդար եւ թափանցիկ ընտրութիւններու միջոցով: «Մենք բոլորս միասին ունինք պատմական հնարաւորութիւնու կատար ածելու այն բոլոր երազանքները, որ տարիներ շարունակ ունէինք, ի կատար ածելու այն երազանքները, որ ունին մեր երեւանցիները: Եւ ես վստահ եմ, որ աւագանիի այս կազմով մենք պիտի ընենք այնպէս, որ մեր երեւանցիները ամէն օր, ամէն ժամ ու ամէն վայրկեան ժպտան: Ես կարեւոր կը համարեմ այս պահը: Երեւանի աւագանիի կազմը ըստ խմբակցութիւններու չեմ տարբերակեր, որովհետեւ մենք բոլորս պէտք է աշխատինք միասին, պէտք է ամէն վայրկեան մտածենք մեր քաղաքին, մեր երեւանցիներուն մասին»,- ըսած է ան:

Դիմելով Երեւանի աւագանիի անդամներուն՝ Հայկ Մարութեան յորդորած է միշտ ուշադիր ըլլալ Երեւանի բնակիչներու բոլոր խնդիրներուն, ահազանգերուն, անյապաղ արձագանգել ու բոլոր հարցերը դնել աւագանիի նիստի քննարկման ու անոնց անյապաղ լուծումներ տալ: