Արցախը Պէտք է Ներգրաւուած Ըլլայ Մարդու Իրաւունքներու Ոլորտի Միջազգային Կառոյցներու Աշխատանքներուն. Թաթոյեան

Հայաստան

Արցախը պէտք է ներգրաւուած ըլլայ մարդու իրաւունքներու ոլորտի միջազգային կառոյցներու աշխատանքներուն: Այս մասին, դիմատետրի իր էջին վրայ գրած է Հայաստանի մարդու իրաւունքներու պաշտպան Արման Թաթոյեան:

Ան, մասնաւորապէս, գրած է.

«Վաղաժամկէտ դադրեցան Արցախի մարդու իրաւունքներու պաշտպան Ռուբէն Մելիքեանի լիազօրութիւնները:

Գործընկերոջս սրտացաւ ու նուիրուած աշխատանքին շնորհիւ՝ իրաւապաշտպան այս հաստատութիւնը միջազգային կառոյցներուն մէջ ստացաւ լայն ճանաչում:

Քաղաքակիրթ աշխարհին պէտք է ճանաչելի դարձնել Արցախը իր ժողովրդավարութեամբ, իրաւապաշտպան համակարգով ու քաղաքացիական հասարակութեամբ: Այստեղ կ՝ապրին կանայք, երեխաներ, տարէցներ, հաշմանդամութիւն ունեցող մարդիկ, որոնց իրաւունքները պէտք է ըլլան պաշտպանուած: Արցախի մէջ բնակող մեր հայրենակիցներու կեանքի ու առողջութեան պաշտպանութիւնը, անոնց ֆիզիքական անվտանգութեան ապահովումը առաջնահերթ են:

Արցախը պէտք է ներգրաւուած ըլլայ մարդու իրաւունքներու ոլորտի միջազգային կառոյցներու աշխատանքներուն: Պէտք է ապահովել միջազգային իրաւապաշտպան հանրութեան այցերը Արցախ:

Այս բոլոր հարցերուն մէջ անփոխարինելի դեր ունի Արցախի մարդու իրաւունքներու պաշտպանը, որ իր անկախ աշխատանքը կ՝իրականացնէ մարդու իրաւունքներու տեսանկիւնէն՝ առանց քաղաքական ազդեցութեան կամ ուղղորդման: Այս հաստատութիւնը ապահոված է արդիւնաւէտ աշխատանք Եուրի Հայրապետեանի գործունէութեամբ ու կայացման բարձր նշաձողի արժանացած Ռուբէն Մելիքեանի նուիրուած ջանքերուն շնորհիւ:

Գործընկերոջս զեկոյցներով քաղաքակակիրթ աշխարհին ներկայացուեցան 2016-ի ապրիլեան պատերազմին ընթացքին ատրպէյճանական զինուած ուժերու կատարած դաժանութիւնները, հայատեացութեան իրական վիճակը եւ այլն: Այդ զեկոյցները ներկայացուած են միջազգային հեղինակաւոր կառոյցներու՝ Human Rights Watch, Amnesty International, European Ombudsman Institute եւ այլն:

Բնոյթով բացառիկ էր Եւրոխորհրդարանի շէնքին մէջ Ռուբէն Մելիքեանի ասուլիսը Արցախի մարդու իրաւունքներու պաշտպանի կարգավիճակով: Արցախի մարդու իրաւունքներու պաշտպանի հաստատութեան կայացման կարեւոր ցուցիչ դարձաւ Ռ.Մելիքեանի մասնակցութիւնը Եւրոպական մարդու իրաւունքներու պաշտպաններու հիմնարկի գլխաւոր ասամպլէայի աշխատանքներուն ու ղեկավար կազմի քուէարկութեան՝ այլ երկիրներու մարդու իրաւունքներու պաշտպանններու հետ հաւասար հիմունքներով: Ռուբէն Մելիքեան զգալի աշխատանք տարաւ նաեւ Սփիւռքի մէջ՝ ներկայացնելով իր գործունէութեան արդիւնքները թէ՛ Սփիւռքին, թէ՛ Սփիւռքի աջակցութեամբ՝ այլ երկիրներուն:

Այս ընթացքին, ի հարկէ, ալ աւելի ամրապնդուեցաւ Հայաստանի եւ Արցախի մարդու իրաւունքներու պաշտպաններու համատեղ աշխատանքը: Անիկա դարձաւ առաւել արդիւնաւէտ ու ամբողջական:

Խորին երախտագիտութիւնս կը յայտնեմ Ռուբէն Մելիքեանին հայրենանուէր աշխատանքին համար եւ կը մաղթեմ անոր նորանոր ձեռքբերումներ ու բազում յաջողութիւններ»: