Ալֆորվիլ Քաղաքին Մէջ Մեկնարկած են «Ֆրանսայի Մէջ Արցախի Օրեր»-ու Ծիրէն Ներս Ընթացող Ձեռնարկները

Աշխարհ, Հայաստան

Սեպտեմբեր 8-ին, Ֆրանսայի Ալֆորվիլ քաղաքին մէջ մեկնարկած են «Ֆրանսայի մէջ Արցախի Օրեր» փառատօնի ծիրէն ներս ընթացող ձեռնարկները, որոնք կը շարունակուին մինչ Սեպտեմբեր 17:

Հանդիսաւոր բացման արարողութեան մասնակցած են Ֆրանսայի մէջ Արցախի Հանրապետութեան մշտական ներկայացուցիչ Յովհաննէս Գէորգեան, ՀՀ դեսպան Յասմիկ Տոլմաճեան, Ալֆորվիլի քաղաքապետ Միշէլ Ժերշինովիչ, Ֆրանսա-Արցախ բարեկամութեան շրջանակի անդամ, ԱԺ պատգամաւոր Լիւք Կարունաս, Ալֆորվիլի քաղաքային խորհուրդի անդամներ, ոչ կառավարական կազմակերպութիւններու ներկայացուցիչներ, լրագրողներ:

0000ALFORTVILLE1Բացման արարողութեան ընթացքին, Ֆրանսայի մէջ ԱՀ ներկայացուցիչը ՀՅԴ՝ Ալֆորվիլի տեղական մարմինի ղեկավար Կարօ Խաչիկեանին յանձնեց ԱՀ «Երախտագիտութիւն» մետալը՝ Ֆրանսայի եւ Արցախի միջեւ բարեկամական կապերու ամրապնդման գործին մէջ ունեցած աւանդին համար:

Ալֆորվիլի մէջ կը նախատեսուին Արցախին նուիրուած լուսանկարներու եւ գծանկարներու ցուցահանդէսներ, վաւերագրական ֆիլմերու ցուցադրութիւններ, ինչպէս նաեւ դասախօսութիւններ՝ Արցախի մէջ առկայ իրավիճակին շուրջ:

2017 Նոյեմբեր 20-ին, բարեկամութեան հռչակագիր ստորագրուած է Արցախի Հանրապետութեան Բերձոր եւ Ֆրանսայի Ալֆորվիլ քաղաքներուն միջեւ:

 

 

ԱՐՑԱԽԻ ՀԱՆՐԱՊԵՏՈՒԹԵԱՆ ԱՐՏԱՔԻՆ

ԳՈՐԾԵՐՈՒ ՆԱԽԱՐԱՐՈՒԹԻՒՆ