Վանայ Lիճը 25 Տարի Ետք Կրնայ Ճահիճի Վերածուիլ․ Թուրք Բնապահպան

Աշխարհ, Էրկիր

Վանայ լիճին իսկական բնապահպանական աղէտ կը սպառնայ․ լիճը, ուր մէկ վայրկեանի մէջ 1.800 թոն կոյուղաջուր կը լեցուի, կրնայ 25 տարի անց ճահիճի վերածուիլ։ Այս մասին կ՛ահազանգէ թուրք բնապահպան Ալի Քալչըք, կը գրէ «Թերթ»-ը՝ վկայակոչելով Gazeteduvar.com.tr կայքը:

Ըստ բնապահպանին` եթէ իշխանութիւնը որեւէ արտակարգ միջոց չձեռնարկէ, Վանայ լիճը պիտի բախուի բնապահպանական մեծ աղէտի:

Քալչըք նաեւ յայտնած է, որ բնապահպանական խնդիրներու պատճառով ամէն տարի լիճին մէջ կը սատկին հազարաւոր ձուկեր ու նաեւ Վանայ տառեխը, որ կը բազմանայ միայն Վանայ լիճի ջուրերուն մէջ:

Թրքական լրատուամիջոցին հետ զրոյցի ընթացքին բնապահպանը նշած է, որ լիճի ջուրը կը պղտորի ոչ միայն կոյուղաջուրերու, այլեւ այստեղ գործող ջրաելեկտարակայաններու եւ տեղի բնակիչներու ու զբօսաշրջիկներու թողած աղբի պատճառով, որ յաճախ չի հաւաքուիր ինքնակառավարան մարմիններուն կողմէ: